ތިލަފުށީގައި ތަރައްޤީކުރާ ބައިނަލްއަޤްވާމީ ވިޔަފާރި ބަނދަރުގެ ފުރިހަމަ ކޮންޓްރޯލާއި ބާރު އޮންނާނީ ދިވެހި ސަރުކާރަށް ކަމަށާއި، އެ ބަނދަރު ހިންގުމުގައި ވަކި ބޭރު ޤައުމަކަށް ނުވަތަ ބަޔަކަށް އިސްކަމެއް ނުދޭނެ ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ހާމަކޮށްފިއެވެ.
އެ ވުޒާރާއިން ފާހަގަކުރި ގޮތުގައި މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމަކީ ރާއްޖޭގެ ވިޔަފާރިއާއި އިޤްތިޞާދީ ދާއިރާ ފުޅާކުރުމަށް ސަރުކާރުން އިސްކަންދީގެން ކުރިއަށްގެންދާ މުހިންމު މަޝްރޫޢެކެވެ. އަދި އެ ބަނދަރުގެ އޮޕަރޭޝަންތަކާއި މެނޭޖްމަންޓްގެ އެންމެހައި ކަންކަން ކުރިއަށްދާނީ ޤައުމީ މަޞްލަޙަތު އެންމެ އިސްކޮށް، ދިވެހި ދައުލަތުގެ ބެލުމުގެ ދަށުންނެވެ.
ބޭރުގެ އެކި ފަރާތްތަކަށް ބަނދަރުގެ ކޮންޓްރޯލް ދޫކޮށްލަން އުޅޭކަމަށް ދެކެވޭ ވާހަކަތައް ދޮގުކުރަމުން، ސަރުކާރުން ބުނީ މި މަޝްރޫޢަކީ ދިވެހި ރައްޔިތުންނަށާއި ވިޔަފާރިވެރިންނަށް އެންމެ ފައިދާހުރި ގޮތަށް ބައްޓަންކުރެވިފައިވާ ބަނދަރެއް ކަމަށެވެ. އެގޮތުން ބަނދަރުގެ މަސައްކަތްތައް ނިމުމުން، މުދާ ބޭލުމާއި އެރުވުމުގެ ކަންކަން މިހާރަށްވުރެ އަވަސްވެ، ލޮޖިސްޓިކްސް ދާއިރާއަށް ބޮޑު ކުރިއެރުމެއް ލިބިގެންދާނެއެވެ.
މީގެ އިތުރުން، އާ ބަނދަރުގެ ޚިދުމަތްތައް ފެށުމާއެކު ދިވެހި މުވައްޒަފުންގެ ވަޒީފާގެ ފުރުޞަތުތައް އިތުރުވެ، ދިވެހި ކުންފުނިތަކަށް ވިޔަފާރީގެ އައު ފުރުޞަތުތައް ތަނަވަސްވެގެންދާނެ ކަމަށްވެސް އެ ވުޒާރާއިން ބަޔާންކުރެއެވެ. ދިވެހި ސަރުކާރުގެ އަމާޒަކީ ޤައުމުގެ އިޤްތިޞާދީ މިނިވަންކަން ދަމަހައްޓައި، ޒަމާނީ ފެންވަރުގެ ބަނދަރެއްގެ ޚިދުމަތް ރައްޔިތުންނަށް ފޯރުކޮށްދިނުމެވެ.
+1
