އެމަނިކުފާނަށް ތާއީދުކުރާ މީހުންގެ އަދަދު މަދު ނޫން ނަމަވެސް، ކުރިއަށް އޮތް ތަނުގައި ހުންނެވީ އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވެރިކަމަށް ގެންނެވުމަށް މަސައްކަތް ކުރެއްވުމަށް ކަމަށް ކުރީގެ ރައީސް މުހައްމަދު ނަޝީދު ހާމަކުރައްވައިފިއެވެ.
އެސްއެސްޓީވީގެ ބާރުހަތަރެއް ޕްރޮގްރާމުގައި ނަަޝީދު ވިދާޅުވީ،، ސިޔާސީ ގޮތުން އެމަނިކުފާނުގެ ފަހަތްޕުޅުގައި ސާބިތުވެ ތިބި ގިނަ އަދަދެއްގެ އާންމު ރައްޔިތުންނާއި ސަޕޯޓަރުން އަދިވެސް އެބަތިބިކަމަށެވެ. ނަމަވެސް، މި ވަގުތުގެ ސިޔާސީ ހާލަތާއި ޕާޓީގެ މަސްލަހަތަށް ބައްލަވާއިރު، އެމަނިކުފާނު އިސްކަންދެއްވަނީ ފައްޔާޒް އިސްމާއިލަށް ފުރިހަމަ އެއްބާރުލުން ދެއްވައި، އޭނާ ކާމިޔާބީއާ ހަމައަށް ވާސިލުކޮށްދެއްވުމަށެވެ.
މީގެ އިތުރުން، އެމްޑީޕީގެ ރިޔާސީ ޕްރައިމަރީގައި ކުރީގެ ރައީސް އިބްރާހިމް މުހައްމަދު ސޯލިހު ވާދަކުރައްވަން ޖެހިވަޑައިގަންނަވާ އެއްވެސް ސަބަބެއް ފެނިވަޑައިނުގަންނަވާ ކަމަށްވެސް އެމަނިކުފާނު ފާހަގަކުރެއްވިއެވެ. އަދި ޕާޓީގެ އެތެރޭގެ ވާދަވެރިކަން އެއްފަރާތްކޮށް، ކުރިއަށް އޮތް ރިޔާސީ ރޭހަށް އެމްޑީޕީ ވަރުގަދަކުރުމަށްޓަކައި އެންމެން އެކަތިގަނޑަކަށް ވެގެން މަސައްކަތްކުރުމުގެ މުހިންމުކަންވެސް އެމަނިކުފާނު ފާހަގަކުރެއްވިއެވެ.
ރައީސް ނަޝީދު އިތުރަށް ބަޔާންކުރެއްވި ގޮތުގައި، އެތެރޭގެ އިންތިހާބުތަކުގައި ފައްޔާޒް އިސްމާއިލަށް ތާއީދުކުރެއްވި ނަމަވެސް، ޑިމޮކްރެޓިކް ހަމަތަކުގެ މަތިން ޕާޓީން ނިންމާ ކޮންމެ ނިންމުމަކަށް ފުރިހަމައަށް އިހުތިރާމުކުރައްވާނެއެވެ. އަދި ޕާޓީގެ އާންމު މެންބަރުންގެ އަގުލަބިއްޔަތުން ކަނޑައަޅާ ރިޔާސީ ކެންޑިޑޭޓަކަށް ފުރިހަމަ ތާއީދު ދެއްވުމުގައި ސާބިތުވެ ދެމިހުންނަވާނެ ކަމުގެ ޔަގީންކަންވެސް އެމަނިކުފާނު ދެއްވިއެވެ.
