ނިމިދިޔަ ހަފްތާގެ ތެރޭގައި ރާއްޖޭގެ އެކި ކަންކޮޅުތަކުގައި ކުއްލި ނުރައްކަލުގެ 29 ހާދިސާއެއް ހިނގާފައިވާ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކުރައްވައިފިއެވެ.
އޮގަސްޓު 30 އިން ސެޕްޓެމްބަރު 5 އަށް އެމްއެންޑީއެފުން އާންމުކުރި ހަފްތާގެ ތަފާސްހިސާބުތަކަށް ބަލާއިރު، މި ހާދިސާތަކުގެ ތެރެއިން އެންމެ ގިނަ ހާދިސާ ރިޕޯޓުކޮށްފައިވަނީ މާލެ ސަރަހައްދުންނެވެ. އެގޮތުން މާލޭ ސަރަހައްދުގައި 26 ހާދިސާއެއް ހިނގާފައިވާއިރު، ސަދަން އޭރިއާގައި 2 ހާދިސާ އަދި ނޮދަން އޭރިއާގައި 1 ހާދިސާ ވަނީ ރިޕޯޓުކޮށްފައެވެ.
އެމްއެންޑީއެފުން މަޢުލޫމާތު ދެއްވި ގޮތުގައި، ރިޕޯޓުކުރެވުނު ހާދިސާތަކުގެ ތެރެއިން އެންމެ ގިނައީ އަލިފާނުގެ ހާދިސާތަކެވެ. އެގޮތުން އަލިފާނުގެ 12 ހާދިސާއެއް ހިނގާފައިވާއިރު، ނުރައްކާތެރި މާއްދާތަކާ ގުޅުންހުރި (ހަޒްމެޓް) 11 ހާދިސާއެއް ވަނީ ހިނގާފައެވެ.
މީގެއިތުރުން، ބަލިމީހުން ކުއްލި ހާލަތުގައި އުފުލުމުގެ (މެޑިކަލް އެވެކުއޭޝަން) 4 ހާދިސާއަކަށް އެމްއެންޑީއެފުން އެހީތެރިކަން ފޯރުކޮށްދީފައިވާއިރު، ނުރައްކަލުން މީހުން ސަލާމަތްކުރުމުގެ 2 ހާދިސާއެއްވެސް މި މުއްދަތުގެ ތެރޭގައި ހިނގާފައިވާކަމަށް އެމްއެންޑީއެފުން ފާހަގަކުރައްވައެވެ.
