ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ތ. ތިމަރަފުށީ ފޭސް 2 ގެ މަގުތައް ޒަމާނީ ފެންވަރަށް ތަރައްގީ ކުރުމުގެ އަމަލީ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ފަށައިފިއެވެ.
މި މަޝްރޫއުގެ ދަށުން ރަށުގެ މައި މަގުތަކުގައި ތާރުއެޅުމާއި، ފެންހިންދާ ނިޒާމު ގާއިމުކުރުމާއި، މަގުބައްތި ޖެހުމުގެ އިތުރުން މަގުތަކުގައި ނިޝާންތައް ހަރުކުރުމުގެ މަސައްކަތް ކުރިއަށްދާނެއެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން ތ. ތިމަރަފުށި ފޭސް 2ގެ މަގުތައް ޒަމާނީ ފެންވަރަށް ތަރައްޤީ ކުރުމުގެ އަމަލީ މަސައްކަތް ވަނީ ފެށިފައި.#TeamRDC pic.twitter.com/PRnJPlnKlW
— Road Development Corporation Ltd (@rdcmaldives) August 26, 2026
މި މަޝްރޫއަކީ ތިމަރަފުށީގެ އިގްތިސާދީ އަދި އިޖުތިމާއީ ތަރައްގީއަށް ކުރިއެރުން ގެނެސްދީ، މަގުތަކުގައި ފެންބޮޑުވުމުގެ މައްސަލައަށް ދާއިމީ ހައްލެއް ހޯދައިދިނުމުގެ މަގުސަދުގައި ކުރިއަށްގެންދާ މުހިންމު މަޝްރޫއެކެވެ. ސަރުކާރުން މި މަޝްރޫއު އާރްޑީސީއާ ހަވާލުކޮށްފައިވަނީ 75.7 މިލިއަން ދިވެހި ރުފިޔާއަށެވެ. މި މަސައްކަތުގެ ސަބަބުން ރަށުގެ ރައްޔިތުންނަށް ދަތުރުފަތުރު ކުރުމުގައި ބޮޑެތި ލުއިފަސޭހަތަކެއް ލިބިގެންދާނެއެވެ.
އާރްޑީސީން މަޢުލޫމާތު ދޭ ގޮތުގައި މަޝްރޫއުގެ އަމަލީ މަސައްކަތްތައް ތަރުތީބުކުރެވިފައިވަނީ ތަކެތި ހޯދުމާއި، ބިން އެއްވަރުކުރުމާއި، އަދި ޑްރެއިނޭޖް ނިޒާމު އެޅުމުގެ މަސައްކަތްތައް އެކުއެކީގައި ކުރިއަށްދާނެ ގޮތަށެވެ. މި މަޝްރޫއު ނިމުމުން ތިމަރަފުށީގެ މަގުތަކަކީ ތާރުއަޅައިގެން ޒަމާނީ ފެންވަރަށް ތަރައްގީކުރެވިފައިވާ ރައްކާތެރި މަގުތަކަކަށް ވެގެންދާނެއެވެ
