ރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަހައްދުން ފްލެޓާއި ގޯއްޗަށް އެދި ހުށަހަޅާފައިވާ ފޯމުތަކުގެ ވެރިފިކޭޝަން މަރުހަލާ ކުރިއަށްދާއިރު، މައުލޫމާތުގައި ފުށުއެރުންތަކެއް ހުރި ފަރާތްތަކަށް އެކަންކަން އިސްލާހުކުރުމަށް ދިން މުއްދަތު 21 ދުވަހަށް އިތުރުކޮށްފިއެވެ.
ގެދޮރުވެރިކަމާ ބެހޭ ވުޒާރާއިން މިއަދު ވިދާޅުވީ، އެޕްލިކެންޓުން ހުށަހެޅި މައުލޫމާތާއި ދައުލަތުގެ ކަމާބެހޭ އިދާރާތަކުން ލިބިފައިވާ މައުލޫމާތާ އަޅާކިއުމުގައި ފުށުއެރުމެއް އުޅޭނަމަ، "ބޯހިޔާވަހިކަން ޕޯޓަލް" މެދުވެރިކޮށް އެކަން ސާފުކޮށްދީ، ބޭނުންވާ ލިޔެކިޔުންތައް ހުށަހެޅުމަށް ކުރިން ދިން ހަތް ދުވަހުގެ މުއްދަތު މިހާރު އިތުރުކޮށްދީފައިވާ ކަމަށެވެ.
މިދިޔަ ޖޫން މަހުގެ 15 ގެ ނިޔަލަށް ޕޯޓަލް މެދުވެރިކޮށް ޖުމްލަ 58،505 ފޯމު ހުށަހަޅާފައިވާއިރު، އޭގެ ތެރޭގައި ފްލެޓަށް އެދުނު 35،930 ފޯމާއި ގޯއްޗަށް އެދި ހުށަހެޅި 22،575 ފޯމު ހިމެނެއެވެ.
މި މަޝްރޫއުގެ ދަށުން މާލޭގެ ރަށްވެހިންނަށް 4،000 ފްލެޓް، މާލޭގައި ދިރިއުޅޭ އެހެން ރަށްރަށުގެ މީހުންނަށް 1،500 ފްލެޓް އަދި ހާއްސަ ކެޓަގަރީތަކަށް 2،400 ފްލެޓް ދިނުމަށް ވަނީ ނިންމާފައެވެ. ސަރުކާރުގެ އަމާޒަކީ 2028 ވަނަ އަހަރުގެ އޮގަސްޓް މަހުގެ ނިޔަލަށް މި ފްލެޓުތަކުގެ މަސައްކަތް އެއްކޮށް ނިންމައި ރައްޔިތުންނާ ހަވާލުކުރުމެވެ.
މީގެއިތުރުން ރަސްމާލެއިން ދޫކުރުމަށް ހަމަޖެހިފައިވާ 25،000 ގޯތީގެ ތެރެއިން ފުރަތަމަ ފިޔަވަހީގެ ދަށުން 15،000 ގޯތި ދޫކުރުމުގެ މަސައްކަތްވެސް ދަނީ ރޭވެމުންނެވެ.
