ޓެކްސް ނެގުމާ ބެހޭ އިދާރީ ގާނޫނަށް ސަރުކާރުގެ ފަރާތުން ހުށަހަޅާފައިވާ އިސްލާހުތައް ރައްޔިތުންގެ މަޖިލީހުގެ އިގުތިސާދީ ކޮމިޓީގައި ބައިވެރިވި މެންބަރުންގެ އިއްތިފާގުން މިއަދު ފާސްކޮށްފިއެވެ.
ވިލިމާލޭ ދާއިރާގެ ޕީއެންސީ މެންބަރު މުޙައްމަދު އިސްމާޢީލް ހުށަހެޅުއްވި މި ބިލުގެ މަގުސަދަކީ ޓެކްސް ދެއްކުމުން ގަސްދުގައި ރެކުމާއި ޓެކްސް ބަޔާން ނުހުށަހެޅުމުގެ މައްސަލަތަކަށް ދެވޭ އަދަބުތައް ވަރުގަދަކުރުމެވެ.
މި އިސްލާހުގެ ދަށުން ޓެކްސް ދެއްކުމުން ގަސްދުގައި އެއްކިބާވާ ނުވަތަ އެކަމަށް އެހީތެރިވާ ފަރާތްތަކަށް ދެވޭ އެންމެ ދިގު ޖަލު ހުކުމް ވަނީ އެއް އަހަރުން ދެ އަހަރަށް ބޮޑުކޮށްފައެވެ. އަދި ޓެކްސް ބަޔާން ނުހުށަހަޅާ ފަރާތްތަކަށް މިހާރު އޮންނަ އެއް މަހާއި ހަ މަހުގެ ގޭބަންދުގެ އަދަބުގެ ބަދަލުގައި، 250,000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާކުރުމާއެކު އެއް މަހާއި ހަ މަހާ ދެމެދުގެ މުއްދަތަކަށް ސީދާ ޖަލަށްލެވޭނެއެވެ.
މީގެއިތުރުން ޓެކްސް ބަޔާނުގައި ނުވަތަ މާލީ ހިސާބުތަކުގައި ސައްހަ ނޫން މައުލޫމާތު ހިމެނުން ނުވަތަ މައުލޫމާތު އުނިކުރުމަކީ ޓެކްސް ދެއްކުމުން ރެކެން ކުރި ކަމެއްގެ ގޮތުގައި ގާނޫނީ ގޮތުން ބެލެވޭނެއެވެ. ހަމައެއާއެކު، ސުންގަޑިއަށް ޓެކްސް ނުދައްކައިފިނަމަ ފާއިތުވާ ކޮންމެ ދުވާލަކަށް އިތުރުވާ ޖޫރިމަނާގެ ރޭޓު ވަނީ 0.05 ޕަސެންޓުން 0.1 ޕަސެންޓަށް ބޮޑުކުރަން ނިންމާފައެވެ.
