ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) އިންފްރާސްޓްރަކްޗަރ މަޝްރޫއުތައް ހިންގުމަށް ބޭނުންވާ ވެހިކަލްތައް ހދ. އަތޮޅުގެ ބައެއް ރަށްރަށަށް ފޮނުވުމުގެ މަސައްކަތް، ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ފަށައިފިއެވެ.
މި މަސައްކަތުގެ ދަށުން ވެހިކަލްތައް ފޮނުވުމަށް ހަމަޖެހިފައިވަނީ ކުޅުދުއްފުށި ސިޓީގެ އިތުރުން ހދ. ނޮޅިވަރަމް އަދި ހދ. ނޮޅިވަރަންފަރަށެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން، ކުޅުދުއްފުށި ސިޓީ، ހދ. ނޮޅިވަރަމް އަދި ހދ. ނޮޅިވަރަންފަރުގައި ހިންގުމަށް ހަމަޖެހިފައިވާ މަޝްރޫއުތަކަށް ބޭނުންވާ ވެހިކަލްތަށް ފޮނުވުމުގެ މަސައްކަތް ދަނީ ކުރަމުންނެވެ.#TeamRDC pic.twitter.com/803FUWqpxi
— Road Development Corporation Ltd (@rdcmaldives) August 25, 2026
މި ވެހިކަލްތައް ފޮނުވުމުގެ މައިގަނޑު ބޭނުމަކީ އާރްޑީސީން އެ ރަށްރަށުގައި ހިންގުމަށް ރޭވިފައިވާ މަގުހެދުމާއި، ބިން ހިއްކުމާއި، ބަނދަރު މަރާމާތުކުރުމާއި، ކުނި މެނޭޖްކުރުން އަދި އިމާރާތްކުރުމުގެ އެކި ތަރައްޤީގެ މަޝްރޫއުތައް އަވަސްކޮށް، އަމަލީ މަސައްކަތްތައް ހިންގުން އިތުރަށް ހަރުދަނާކުރުމެވެ.
މެޝިނރީއާއި ވެހިކަލްތައް އެ ރަށްރަށަށް ފޯރުކޮށްދިނުމުން، މަޝްރޫއުތައް ހުއްޓުމެއްނެތް ގޮތެއްގައި ކުރިއަށްދިއުމަށް ބޮޑު މަގުފަހިކަމެއް ލިބިގެންދާނެއެވެ.
ސަރުކާރާއި އާރްޑީސީ ގުޅިގެން މަސައްކަތް ކުރަމުންދަނީ އަތޮޅުތަކުގެ ތަރައްޤީގެ މަޝްރޫއުތައް ލަސްވިޔަނުދީ، އެކަށީގެންވާ ސްޕީޑެއްގައި ކުރިއަށްގެންދިއުމަށެވެ. އެގޮތުން ހދ. އަތޮޅުގެ މި ތިން ރަށަށް ބޭނުންވާ ވެހިކަލްތައް ފޮނުވުމުގެ އަމަލީ މަސައްކަތްތައް ކުރިއަށްދާއިރު، މިއީ އެ ރަށްރަށުގެ އިޤްތިޞާދީ އަދި އިޖުތިމާއީ ތަރައްޤީއަށް ލިބިގެންދާނެ މުހިންމު ކުރިއެރުމެކެވެ.
