ގދ. ފިޔޯރީގެ މަގުތައް ޑިޒައިން އެންޑް ބިލްޑް އުސޫލުން ޒަމާނީ ފެންވަރަށް ތަރައްޤީ ކުރުމުގެ ބޮޑު މަޝްރޫއުގެ އަމަލީ މަސައްކަތް ފެށުމަށްޓަކައި ވާންޖެހޭ ތައްޔާރީތަކުގެ ތެރެއިން ސައިޓް ސާވޭ ކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ފަށައިފިއެވެ.
މި ސާވޭގެ ތެރެއިން މަގުތަކުގެ މިހާރުގެ ހާލަތާއި، ފެންބޮޑުވާ ސަރަހައްދުތަކާއި، މަގުތަކުގައި ނެޓްވޯކްތައް އެޅުމަށް ބޭނުންވާ ޓެކްނިކަލް މައުލޫމާތުތައް އެއްކުރުމުގެ މަސައްކަތް ކުރިއަށްދާނެއެވެ.
މި މަޝްރޫއަކީ ފިޔޯރީގެ މަގުތަކުގައި ފެންބޮޑުވުމުގެ މައްސަލައަށް ދާއިމީ ހައްލެއް ހޯދައިދީ، ރަށުގެ އުމްރާނީ ތަރައްގީއަށް ބޮޑު ބަދަލެއް ގެނައުމުގެ މަގުސަދުގައި ސަރުކާރުން ކުރިއަށްގެންދާ މުހިންމު މަޝްރޫއެކެވެ. މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗާގެ ފަރާތުން ފިޔޯރީގެ މަގުތައް ހެދުމުގެ މަސައްކަތް އާރްޑީސީއާ ހަވާލުކޮށްފައިވަނީ ޖުމްލަ 71.2 މިލިއަން (71,208,238.32) ރުފިޔާއަށެވެ.
މި މަޝްރޫއުގެ އެއްބަސްވުމުގައި ސަރުކާރާއި އާރްޑީސީއާ ދެމެދު ސޮއިކޮށްފައިވަނީ 2025 ވަނަ އަހަރުގެ ޑިސެމްބަރު މަހުގެ ތެރޭގައެވެ. އެއްބަސްވުމުގައިވާ ގޮތުން މި މަޝްރޫއުގެ މުޅި މަސައްކަތް އެއްކޮށް ނިންމުމަށް އާރްޑީސީއަށް ދީފައިވަނީ 730 ދުވަސް (2 އަހަރު) ގެ މުއްދަތެކެވެ. މަޝްރޫއުގެ ދަށުން ފިޔޯރީގެ ބޮޑެތި މަގުތަކުގައި ތާރުއެޅުމާއި، ފެންހިނދާ ނިޒާމު ގާއިމުކުރުމާއި، މަގުބައްތި ޖެހުމުގެ އިތުރުން މަގުތަކުގައި ސައިންބޯޑު ހަރުކުރުމުގެ މަސައްކަތް ކުރިއަށްދާނެއެވެ.
އާރްޑީސީން މަޢުލޫމާތު ދޭ ގޮތުގައި، ސާވޭގެ މަސައްކަތް ނިމުމާއެކު މަޝްރޫއަށް ބޭނުންވާ ޑިޒައިންތައް ފައިނަލްކޮށް، މަގުތައް ކޮނުމާއި ތާރުއެޅުމުގެ އަމަލީ މަސައްކަތްތައް ހުއްޓުމެއްނެތި ކުރިއަށްދާނެއެވެ. މި މަޝްރޫއު ނިމިގެންދާއިރު ފިޔޯރީގެ ރައްޔިތުންނަށް ދަތުރުފަތުރުކުރުމުގައި ބޮޑެތި ފަސޭހަތަކެއް ލިބި، ރަށުގެ އިގްތިސާދީ އަދި އިޖުތިމާއީ ހަރަކާތްތަކަށް އިތުރު ދިރުމެއް ލިބިގެންދާނެއެވެ.
