އދ. ދިގުރަށުގައި ގާއިމުކުރާ އެމްއެންޔޫ ރީސާޗް ފެސިލިޓީއާއި ސްކޫލް އިމާރާތުގެ މަސައްކަތަށް ބޭނުންވާ ސާމާނު ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ން އެރަށް ގެންގޮއްސިއެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން އދ. ދިގުރަށުގައި ގާއިމުކުރުމަށް ހަމަޖެހިފައިވާ ދިވެހިރާއްޖޭގެ ގައުމީ ޔުނިވަސިޓީ (އެމްއެންޔޫ) ގެ ރީސާޗް ފެސިލިޓީ އަދި 3 ފަންގިފިލާގެ އާ ސްކޫލް އިމާރާތުގެ މަސައްކަތަށް ބޭނުންވާ ސާމާނު މިހާރު ވަނީ އެރަށު ސައިޓަށް ގެންގޮސްފައެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން އދ. ދިގުރަށުގައި ޤާއިމުކުރުމަށް ހަމަޖެހިފައިވާ އެމް.އެން.ޔޫ ގެ ރީސާޗް ފެސިލިޓީ އަދި 3 ފަންގިފިލާގެ ސްކޫލް އިމާރާތުގެ މަސައްކަތަށް ބޭނުންވާ ސާމާނު މިހާރު ވަނީ އެރަށު ސައިޓަށް ގެންދެވިފައި.#TeamRDC pic.twitter.com/IzHGlzOBpF
— Road Development Corporation Ltd (@rdcmaldives) August 20, 2026
ސަރުކާރުން ތައުލީމީ ދާއިރާ ތަރައްގީކުރުމަށާއި މަތީ ތައުލީމާއި ދިރާސާކުރުމުގެ ފުރުސަތުތައް ރާއްޖޭގެ އެކި ކަންކޮޅުތަކަށް ފުޅާކުރުމަށް ކުރަމުންދާ މަސައްކަތުގެ ތެރެއިން ކުރިއަށްދާ މި މަޝްރޫއުގެ ތަކެތި ސައިޓަށް ގެންދެވުމާއެކު، އަމަލީ މަސައްކަތްތައް އަވަސްވެގެންދާނެއެވެ.
މި މަޝްރޫއުގެ ދަށުން ދިގުރަށުގައި ގާއިމުކުރެވޭ އެމްއެންޔޫގެ ރީސާޗް ފެސިލިޓީއަކީ އެ ސަރަހައްދުގެ ކަނޑުގެ ތިމާވެއްޓާއި މާހައުލީ ނިޒާމުތަކާ ގުޅޭގޮތުން ފުޅާ ދާއިރާއެއްގައި ދިރާސާތައް ކުރުމަށް މަގުފަހިވެގެންދާނެ މުހިންމު މަރުކަޒެކެވެ.
މީގެއިތުރުން، 3 ފަންގިފިލާއަށް އިމާރާތްކުރެވޭ އާ ސްކޫލް އިމާރާތާއެކު، ދިގުރަށު ސްކޫލަށް ދިމާވެފައިވާ ޖާގައިގެ ދަތިކަމަށް އެދެވޭ ހައްލެއް ލިބި، ޒަމާނީ ވަސީލަތްތަކާއެކު އުނގަންނައިދިނުމުގެ މާހައުލު އިތުރަށް ހަރުދަނާވެގެންދާނެ ކަމަށް ބެލެވެއެވެ.
