ދިވެހި ތާރީހާއި ސަގާފަތާ ގުޅިފައިވާ އެންމެ މުހިންމު އެއް ބިނާ ކަމަށްވާ ހއ. އުތީމު ގަނޑުވަރުގެ އާބާތުރަ ފިލުވުމުގެ މަސައްކަތް ފުރިހަމަކޮށް، އަލުން އާންމުންނަށް ޒިޔާރަތްކުރެވޭ ގޮތަށް މިއަދު ވަނީ ހުޅުވާލާފައެވެ.
ސަޤާފީ ތަރިކަ ރައްކާތެރިކުރާ ގައުމީ މަރުކަޒުން މައުލޫމާތު ދެއްވާފައިވާ ގޮތުގައި، ސަރުކާރު ބަންދު ދުވަސްތައް ފިޔަވައި ހޮނިހިރު ދުވަހުން ފެށިގެން ބުރާސްފަތި ދުވަހުގެ ނިޔަލަށް، ހެނދުނު 8:00 އިން މެންދުރުފަހު 2:00 އަށް ގަނޑުވަރު ހުޅުވިފައި ހުންނާނެއެވެ. އަދި ބަލައިލަން އަންނަ ފަރާތްތަކަށް ޓިކެޓް ދޫކުރުމަށް ހަމަޖެހިފައިވަނީ ހެނދުނު 8:15 އިން މެންދުރުފަހު 1:30 އާ ހަމައަށެވެ.
ޕޯޗުގީޒުންގެ އަޅުވެތިކަމުން ރާއްޖެ ސަލާމަތްކޮށްދެއްވި ގައުމީ ބަތަލު، އައްސުލްތާނުލް ޣާޒީ މުހައްމަދު ތަކުރުފާނުލް އަޢުޡަމް (ބޮޑުތަކުރުފާނު) ގެ ޒިކުރާއާ ގުޅިފައިވާ މި ގަނޑުވަރަށް 400 ވަރަކަށް އަހަރު ވެފައިވާއިރު، މިއީ ދިވެހިންނާއި ބޭރުގެ ފަތުރުވެރިންގެ މެދުގައިވެސް މަގުބޫލު އާސާރީ ތަރިކައެކެވެ. ޑިޕާޓްމަންޓް އޮފް ހެރިޓޭޖާއި، އުތީމު ކައުންސިލް އަދި އެ ރަށު ރައްޔިތުންގެ ހާއްސަ ސަމާލުކަމަކާއެކު ބަލަހައްޓަމުން އަންނަ މި ގަނޑުވަރުގައި މަރިޔާދުގޭގެ ނުހުޅުވޭ ދޮރުކޮޅާއި، "ލެއްގި ވަޅުކޮޅު" އަދި ބޭރުގެ މަންޒަރުތައް އެކޮޅުކޮޅުން ކުލަކޮށް ފެންނަ ފޮތިގަނޑު ފަދަ ތަފާތު އަޖައިބުތައް ހިމެނެއެވެ. މި ތާރީހީ ބިނާ އަލުން ހުޅުވާލުމަކީ ރާއްޖޭގެ ތަރިކަ އަންނަން އޮތް ޖީލުތަކަށް ފޯރުކޮށްދިނުމަށް އެޅުނު މުހިންމު ފިޔަވަޅެކެވެ.
