ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) އިން އިންތިޒާމުކޮށްގެން ބާއްވާ 9 ވަނަ "ތެވެލި ބައިނަލްއަގުވާމީ މަހާސިންތާ" ރެކޯޑު އަދަދެއްގެ ދިރާސާ ކަރުދާހާއެކު ރަސްމީކޮށް އިފްތިތާހުކޮށްފިއެވެ.
އެމްއެންޔޫގެ އިދާރީ މަރުކަޒުގެ އޮޑިޓޯރިއަމްގައި ބޭއްވި މި ހާއްސަ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުހައްމަދެވެ. 2017 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މަހާސިންތާގެ މިއަހަރުގެ ޝިއާރަކީ "ޓްރާންސްފޯމޭޓިވް އިނޮވޭޝަން އިން ދަ ޓްވެންޓީފަސްޓް ސެންޗަރީ: ސައިންސް، ޓެކްނޮލޮޖީ އެންޑް ސޮސައިޓީ" އެވެ.
މި މަހުގެ 17 އިން 19 އަށް ކުރިއަށްދާ މި މަހާސިންތާއަށް ދުނިޔޭގެ 25 ގައުމަކުން 330 ދިރާސާ ކަރުދާސް ހުށަހަޅާފައިވާއިރު، މިއީ ރާއްޖޭގައި ބޭއްވުނު މިފަދަ އިލްމީ ބައްދަލުވުމެއްގައި އެންމެ ގިނަ އަދަދަކަށް ކަރުދާސް ހުށަހެޅުނު ފަހަރެވެ. މި ކޮންފަރެންސްގައި ތިމާވެއްޓާއި މޫސުމަށް އަންނަ ބަދަލުތައް، އައު އީޖާދުތަކާއި ޓެކްނޮލޮޖީ، އާޓިފިޝަލް އިންޓެލިޖެންސް (އޭއައި)، ސިއްހީ ދާއިރާ، އިގްތިސާދު އަދި ތައުލީމީ ދާއިރާ ފަދަ މުހިންމު ދާއިރާތަކުން ކަރުދާސްތައް ހުށަހެޅޭނެއެވެ. އަދި މި ސެޝަންތަކުގައި ބޭރުގެ މާހިރުންނާއި، ޕްރޮފެސަރުންގެ އިތުރުން ދިރާސާވެރިން މައުލޫމާތު ހިއްސާކުރާނެއެވެ.
ރަސްމިއްޔާތުގައި ވާހަކަދައްކަވަމުން އެމްއެންޔޫގެ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް ވިދާޅުވީ، ރާއްޖެއަކީ ކުޑަ ޖަޒީރާ ގައުމަކަށް ވިޔަސް، މި ކޮންފަރެންސްގެ ޒަރީއާއިން އުފައްދާ އިލްމީ ހޯދުންތަކުގެ ފައިދާ މުޅި ދުނިޔެއަށް ފޯރާނެ ކަމަށެވެ.
ގައުމީ ފެންވަރުގައި ސިޔާސަތުތައް އެކުލަވައިލުމުގައި އިލްމީ ދިރާސާތަކުގެ އަލީގައި ކަންކަން ނިންމުމަށް ބާރުއެޅުމުގެ މަގުސަދުގައި ބާއްވާ މި މަހާސިންތާގެ ހަވާސާގައި، ޑިގްރީ ދަރިވަރުންނަށް ހާއްސަ ރިސާޗް ސިމްޕޯޒިއަމެއް ބޭއްވުމުގެ އިތުރުން، މައި ކޮންފަރެންސް ނިމުމަށްފަހު މި މަހުގެ 20 ވަނަ ދުވަހު ހާއްސަ ވޯކްޝޮޕްތަކެއް ކުރިއަށް ގެންދިއުމަށް ވަނީ ހަމަޖެހިފައެވެ.
