މާލެ، ވިލިމާލެ، ގުޅިފަޅު އަދި ތިލަފުށި ގުޅުވާލުމަށް ކުރިއަށްދާ ތިލަމާލެ ބްރިޖު މަޝްރޫއުގެ %76.1 މަސައްކަތް މިހާތަނަށް ނިމިފައިވާ ކަމަށް އިމާރާތް ކުރުމާއި ބިނާރާ ބެހޭ ވުޒާރާއިން ހާމަކޮށްފިއެވެ.
އެ ވުޒާރާގެ ޑެޕިއުޓީ މިނިސްޓަރު މައުލޫމާތު ދެއްވި ގޮތުގައި، މުޅި ބްރިޖުގެ މަސައްކަތް އެއްކޮށް ނިންމައި އާންމު ދަތުރުފަތުރަށް ހުޅުވާލެވޭނެ ކަމަށް މިހާރު ލަފާކުރެވެނީ 21 ޑިސެންބަރު 2027 ގައެވެ.
މަޝްރޫއުގެ އަމަލީ މަސައްކަތްތަކަށް ބަލާއިރު، ބްރިޖު ޑެކަށް ބޭނުންވާ 1،222 ސެގްމަންޓްސްގެ ތެރެއިން %84 ސެގްމަންޓްސް ކާސްޓްކޮށް ނިމިފައިވާއިރު، އޭގެ ތެރެއިން %54 ސެގްމަންޓްސް ވަނީ އިންސްޓޯލްކޮށް ނިންމާފައެވެ. މީގެއިތުރުން، ގުޅިފަޅުގައި ބްރިޖާ ގުޅޭ މަގުތައް ހެދުމުގެ މަސައްކަތް ކުރިއަށްދާއިރު، ތިލަފުށީގައި ދަނީ ރިވެޓްމަންޓް ޖެހުމާއި ކަލްވާޓްސް ހަރުކުރުމުގެ މަސައްކަތްތައް ހިނގަމުންނެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އިންޑިއާގެ އެފްކޮންސް އިންފްރާސްޓްރަކްޗާއާ އޮގަސްޓް 26، 2021 ގައި ހަވާލުކުރި މި މަޝްރޫއަކީ އެ ސަރުކާރުގެ އެންމެ ބޮޑު އުމްރާނީ ތަރައްގީގެ މަޝްރޫއެވެ. ނަމަވެސް، އެ ސަރުކާރުގެ ދައުރު ނިމުނުއިރު މަޝްރޫއުގެ ދެބައިކުޅަ އެއްބަޔާ ގާތަށް ވެސް މަސައްކަތް ނިމިފައެއް ނުވެއެވެ.
ޖުމްލަ 6.7 ކިލޯމީޓަރުގެ ދިގު މި ލިންކްގެ ދަށުން މައިގަނޑު ތިން ބްރިޖެއް އަޅާނެއެވެ. އެއީ މާލެ-ވިލިމާލެ، ވިލިމާލެ-ގުޅީފަޅު، އަދި ގުޅީފަޅު-ތިލަފުށި ގުޅާލާ ބްރިޖުތަކެވެ. މި މަޝްރޫއުގައި ކަނޑުގައި އަޅާ 140 މީޓަރުގެ ތިން ނެވިގޭޝަން ބްރިޖާއި، 1.45 ކިލޯމީޓަރުގެ މެރިން ވިއަޑަކްޓް، 2.32 ކިލޯމީޓަރުގެ މޫދު/ގޮނޑުދޮށް ވިއަޑަކްޓް އަދި 2.96 ކިލޯމީޓަރުގެ އެއްގަމު މަގު ހިމެނެއެވެ. މީގެއިތުރުން ވިލިމާލޭގައި ރޭމްޕެއް ހެދުމާއި، ވިލިމާލެ އަދި ތިލަފުށިން ބައެއް ހިއްކުން ވެސް ހިމެނެއެވެ.
ޖުމްލަ 500 މިލިއަން ޑޮލަރު (7.7 ބިލިއަން ރުފިޔާ) ހަރަދުވާ މި ބިޔަ މަޝްރޫއަށް އިންޑިއާ ސަރުކާރުން ވަނީ 400 މިލިއަން ޑޮލަރުގެ ލޯނު އެހީގެ އިތުރުން 100 މިލިއަން ޑޮލަރުގެ ހިލޭ އެހީ ދީފައެވެ.
