މާލެ ސަރަހައްދުގައި ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމާއި، މީހުންނަށް ހަމަލާދިނުމުގެ އިތުރުން މުދަލަށް ގެއްލުން ދިނުމުގެ ތުހުމަތުގައި ބިދޭސީ ޒުވާނަކު ކޯޓު އަމުރެއްގެ ދަށުން ހައްޔަރުކޮށްފިއެވެ.
ކްރިމިނަލް ކޯޓުން އިއްޔެ ނެރުނު އަމުރެއްގައިވާ ގޮތުން، މި މައްސަލައާ ގުޅިގެން ހައްޔަރުކޮށްފައިވަނީ ބަންގްލަދޭޝްއަށް ނިސްބަތްވާ އުމުރުން 19 އަހަރުގެ ސިއަމް ބެޕަރި ނަމަކަށް ކިޔާ މީހެކެވެ. ކޯޓުން ވަނީ އެ ޒުވާނާގެ މައްޗަށް ތަހުގީގު މަރުހަލާ ނިމެންދެން ބަންދުގައި ބެހެއްޓުމަށް އަމުރުކޮށްފައެވެ.
މި ހާދިސާ ހިނގާފައިވާ ގޮތަށް ބަލާއިރު މީހަކަށް ޖިސްމާނީ ބޮޑެތި އަނިޔާތަކެއް ލިބިފައިވާކަމަށާއި، އަދި ކުށުގެ ތުހުމަތު ކުރެވޭ ސިއަމް ބެޕަރީއަށް ވެސް އެކިވަރުގެ އަނިޔާ ލިބިފައިވާކަން ކޯޓު އަމުރުން އެނގެއެވެ.
ފުލުހުންގެ ފަރާތުން މި މާރާމާރީއާ ގުޅޭ އިތުރު ތަފުސީލެއް އަދި ހާމަކޮށްފައި ނުވި ނަމަވެސް، އޭނާއާ ދެކޮޅަށް އެކަށީގެންވާ ވަރަށް ހެކި ހުށަހަޅާފައިވާ ކަމަށް ކޯޓުން ބުނެއެވެ. އޭގެ ތެރޭގައި ފުލުހުންގެ އިންޓެލިޖެންސް ރިޕޯޓާއި، އަނިޔާ ލިބުނު ފަރާތްތަކުގެ ބަޔާންތަކުގެ އިތުރުން އަނިޔާތައް ދައްކުވައިދޭ ފޮޓޯތައް ހިމެނެއެވެ.
މި ޒުވާނާ ބަންދުކުރުމަށް ކޯޓުން އަމުރުކޮށްފައިވަނީ "ގޭންގުތަކުން ހިންގާ ކުށްތަކާއި އެ ނޫން ވެސް ނުރައްކާތެރި ކުށްތައް ހުއްޓުވުމުގެ ގާނޫނު" ގެ ދަށުންނެވެ. ރާއްޖޭގެ އާބާދީގެ ކޮންމެ ތިން މީހަކުން އެކަކީ ބިދޭސީއަކަށް ވާއިރު، ގަވާއިދާ ޚިލާފަށް އުޅޭ ބިދޭސީންނާއި ކުށްތަކަށް އަރައިގަންނަ ބިދޭސީންގެ މައްސަލަ ވަނީ ވަރަށް ބޮޑުވެފައެވެ. މިފަދަ ކަންކަން ހުއްޓުވުމުގެ ގޮތުން، ޖިނާއީ ކުށްތަކަށް އަރައިގަންނަ ބިދޭސީން 48 ގަޑިއިރު ތެރޭގައި ޑީޕޯޓު ކުރާނެ ކަމުގެ އިންޒާރު ހޯމް މިނިސްޓަރު އަލީ އިހުސާން މީގެ ކުރިން ދެއްވާފައިވާކަން ވެސް ފާހަގަކޮށްލެވެއެވެ.
