ހުޅުމާލޭ ހޮސްޕިޓަލަށް ޑޮކްޓަރަށް ދައްކަން ދިޔަ މީހަކަށް އެ ހޮސްޕިޓަލުގެ މުވައްޒަފަކު ޖިންސީ ގޯނާ ކުރި ކަމަށް ބުނެ މީސްމީޑިއާގައި ފެތުރެމުންދާ ވާހަކަތަކަކީ ހަގީގަތާ ހިލާފު ވާހަކަތަކެއް ކަމަށް އެ ހޮސްޕިޓަލުން ބުނެފިއެވެ.
އެ ހޮސްޕިޓަލުން ނެރުނު ބަޔާނެއްގައި ބުނެފައިވަނީ، ލިބިފައިވާ މައުލޫމާތުތަކަށް ބަލާއިރު މީސްމީޑިއާގައި ދެކެވޭ އެފަދަ ވާހަކަތަކުގައި އެއްވެސް ހަގީގަތެއް ނެތް ކަމަށެވެ. އަދި އެ ހޮސްޕިޓަލަކީ އަބަދުވެސް ބަލިމީހުންނަށް ދެވޭ ފަރުވާއާއި ސިއްހީ ހިދުމަތުގެ ފަންނީ މިންގަނޑުތައް އެންމެ މަތީ ދަރަޖައިގައި ހިފެހެއްޓުމަށް މަސައްކަތްކުރާ ދައުލަތުގެ މުއައްސަސާއެއް ކަމަށްވެސް އެ ހޮސްޕިޓަލުން ފާހަގަކުރިއެވެ.
އެ ހޮސްޕިޓަލުން އިތުރަށް ބުނެފައިވަނީ، ބަލިމީހުން ބަލައި ފަރުވާދިނުމުގައި އެމީހުންގެ ކަރާމާތާއި އަމިއްލަ މިނިވަންކަމަށް އިހުތިރާމުކުރުމާއެކު، ބަލިމީހާގެ ރުހުން ހޯދުމާއި، ކަނޑައެޅިފައިވާ ކްލިނިކަލް އުސޫލުތަކާ އެއްގޮތަށް ހިދުމަތް ދިނުމަށް އަބަދުވެސް ބާރުއަޅަމުންދާ ކަމަށެވެ. އަދި ގާނޫނާއި ގަވާއިދާ އެއްގޮތަށް ބަލިމީހުންނާއި މުވައްޒަފުންގެ އަމިއްލަ މައުލޫމާތާއި ސިއްރުތައް ހިފެހެއްޓުމަކީ ހޮސްޕިޓަލުން ކަށަވަރުކުރާނެ ކަމެއް ކަމަށްވެސް ބުނެފައިވެއެވެ. ހަގީގަތް ބެލުމެއްނެތި ފަތުރާ މައުލޫމާތުތަކުގެ ސަބަބުން ހިދުމަތް ހޯދާ ފަރާތްތަކަށާއި، ސިއްހީ ހިދުމަތްތެރިންނަށް އަދި އެފަރާތްތަކުގެ އާއިލާތަކަށް ނަފްސާނީ ނުތަނަވަސްކަން ލިބި، ސިއްހީ نظام އަށް އޮންނަ އިތުބާރު ގެއްލިގެންދާތީ އެކަމާ މެދު ހޮސްޕިޓަލުން ވަނީ ނުހަނު ކަންބޮޑުވުން څرގަންދީފައެވެ.
އެހެންކަމުން، އެކަށީގެންވާ ގޮތެއްގައި ހިދުމަތް ފޯރުކޮށްދިނުމަށް ދަތިތަކާ ކުރިމަތިނުވާނެ ގޮތަށް، ކަށަވަރުނުވާ ހަގީގަތާ ހިލާފު މައުލޫމާތު ނުފެތުރުމަށް ހުޅުމާލޭ ހޮސްޕިޓަލުން ވަނީ އިލްތިމާސްކޮށްފައެވެ. އަދި އެތަނުން ދޭ ހުރިހާ ހިދުމަތްތަކަކީވެސް ބަލިމީހުންގެ ރައްކާތެރިކަމާއި އިތުބާރު ދެމެހެއްޓުމަށް އިސްކަންދީގެން ދެވޭ ހިދުމަތްތަކެއް ކަމުގެ ޔަގީންކަން ދެމުން، ބަލިމީހުން ހުށަހަޅާ ކޮންމެ މައްސަލައަކީ ސީރިއަސް މައްސަލައެއްގެ ގޮތުގައި ބަލައި، ގާނޫނާއި ގަވާއިދުގެ ތެރެއިން އަޅަންޖެހޭ ފިޔަވަޅުތައް އަބަދުވެސް އަޅަމުންދާނެ ކަމަށް އެ ހޮސްޕިޓަލުން މައުލޫމާތުދެއެވެ.
