ރައީސް ޔާމީންގެ ވެރިކަމުގައި ދައުލަތް ހިންގީ ހައުސިން މިނިސްޓްރީގެ ތެރެއިން ރައީސް މުއިއްޒު: ޝުޖާއު

ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި މުޅި ދައުލަތް ހިންގުމުގެ އެންމެ އިސް ޒިންމާތަކެއް އުފުލައި، އެ މަސައްކަތްތައް ކުރިއަށް ގެންދިޔައީ އޭރުގެ ހައުސިން މިނިސްޓަރު އަދި މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ މިނިސްޓްރީގެ ތެރެއިން ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެއެވެ.

ޕީޕަލްސް ނޭޝަނަލް ކޮންގްރެސްގެ ފަރާތުން ބޭއްވި ހަރުގެ ޖަލްސާއެއްގައި ވާހަކަދައްކަވަމުން އޭނާ ވަނީ ކުރީގެ ސަރުކާރުގައި ގެނައި ތަރައްގީގެ ހަގީގީ ހިއްސާދާރަކީ ރައީސް ޑރ. މުހައްމަދު މުއިއްޒު ކަމަށް ވިދާޅުވެފައެވެ.

މެންބަރު ޝުޖާއު ފާހަގަކުރެއްވި ގޮތުގައި ރައީސް ޔާމީންގެ ޒައާމަތުގައި ރާއްޖެއަށް ގެނައި ބޮޑެތި އުމްރާނީ ބިނާތަކާއި ތަރައްގީގެ ބިޔަ މަޝްރޫއުތައް އަމަލީގޮތުން ހިންގައި ބެލެހެއްޓެވީ އޭރުގެ ހައުސިން މިނިސްޓްރީގެ ތެރެއިން ރައީސް މުއިއްޒެވެ. އެގޮތުން ސިނަމާލެ ބްރިޖާއި، ދަރުމަވަންތަ ހޮސްޕިޓަލް އަދި ސަލްމާން މިސްކިތް ފަދަ ބޮޑެތި މަޝްރޫއުތަކުގެ ފަހަތުގައި ހުންނެވީ ރައީސް މުއިއްޒު ކަމަށް ވާއިރު، އެ ތަރައްގީގެ ކްރެޑިޓް ހަމައެކަނި ރައީސް ޔާމީނަށް ނުނެގޭނެ ކަމަށް އޭނާ ވިދާޅުވިއެވެ.

މީގެ އިތުރުން، ކުރީގެ ސަރުކާރުގައި ގެނެސްދިން ތަރައްގީއަކީ އޭރުގެ ކޯލިޝަންގެ ލީޑަޝިޕާއި މިހާރުގެ ސަރުކާރުގައި ތިއްބެވި ބޭފުޅުންގެ ބުރަ މަސައްކަތް ކަމަށް ޝުޖާއު ބަޔާންކުރެއްވިއެވެ. އެހެންކަމުން އެ ތަރައްގީގެ ކާމިޔާބީގައި އެ ބޭފުޅުންގެ ނަންތައްވެސް ހިމެނެންޖެހޭނެ ކަމަށާއި، މުޅި ދައުލަތުގެ ހިންގުން އޭރު ބިނާވެފައި އޮތީ ހައުސިން މިނިސްޓްރީގެ ހީވާގި މަސައްކަތްތަކުގެ މައްޗަށް ކަމަށް އޭނާ ފާހަގަކުރެއްވިއެވެ.

ރައީސް ޔާމީންގެ ސިޔާސަތުތަކަށް ފާޑުވިދާޅުވަމުން ޝުޖާއު ވިދާޅުވީ، އޭރުގެ ސަރުކާރުގެ ކާމިޔާބީތަކުގެ ވާހަކަ ދައްކާއިރު އެކަމުގައި އަމަލީ ގޮތުން ރެއާއި ދުވާލު އުޅުއްވި ބޭފުޅުންގެ އަގު ވަޒަންކުރަންޖެހޭނެ ކަމަށެވެ. އަދި މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ އޭރުވެސް އަދި މިހާރުވެސް ގައުމީ ތަރައްގީގެ އެންމެ އިސް ބާނީ ކަމަށް ޝުޖާއު ވިދާޅުވިއެވެ.