މާލޭގެ އަމީނީ މަގުގެ ތާރުގަނޑު ހަލާކުވެފައިވާ ސަރަހައްދުތައް އަލުން މަރާމާތުކޮށް ރަނގަޅުކުރުމުގެ އަމަލީ މަސައްކަތް ކުރިއަށް އޮތް ނޮވެންބަރު މަހުގެ ނިޔަލަށް އެއްކޮށް ނިންމުމަށް އަމާޒު ހިފައިފިއެވެ.
މި މަޝްރޫއަކީ އަމީނީ މަގު ބޭނުންކުރާ ދަތުރުވެރިންނަށާއި އާންމު ރައްޔިތުންނަށް ދިމާވަމުންދާ ދަތިތަކަށް އަވަސް ހައްލެއް ހޯދައިދިނުމަށްޓަކައި ސަރުކާރުން އިސްކަންދީގެން ކުރިއަށްގެންދާ މުހިންމު މަސައްކަތެކެވެ.
މި މަގު މަރާމާތު ކުރުމުގެ އަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން މިހާރު ވަނީ ފަށާފައެވެ. މަސައްކަތް ފެށުމުގެ ކުރިން އެ ކުންފުނިން ވަނީ މަގުގެ ހާލަތު ދެނެގަތުމަށް ބޭނުންވާ ސާވޭތަކާއި ކޯ ކަޓިންގެ މަސައްކަތްތައް ފުރިހަމަކޮށްފައެވެ.
މި މަޝްރޫއުގެ ދަށުން ފުރަތަމަ މަރާމާތު ކުރުމަށް ހަމަޖެހިފައިވަނީ ދަރުމަވަންތަ ޕާކުން ފެށިގެން އިއްޒުއްދީން މަގާ ހަމައަށް އޮތް ސަރަހައްދެވެ. މާލޭގެ އެންމެ ކާރޫބާރު ބޮޑު އެއް މަގު ކަމަށްވާ އަމީނީ މަގުގެ ބައެއް ސަރަހައްދުތަކުގައި ތާރުގަނޑު ހަލާކުވެ، ބޮޑެތި އަޑިގުޑަންތަކާއި ވަޅުގަނޑުތައް ހެދުމުގެ ސަބަބުން ދަތުރުފަތުރު ކުރުމުގައި އާންމުންނަށް ގިނަ ތަކުލީފުތަކަކާ ކުރިމަތިލާން ޖެހިފައިވެއެވެ.
ވަކިން ހާއްސަކޮށް މާފަންނު ސްޓޭޑިއަމް ސަރަހައްދާއި ފުޑްކޯޓު ކައިރީގެ މަގު ވަރަށް ބޮޑަށް ހަލާކުވެފައި އޮތުމުން އާންމުންގެ ޝަކުވާތައް ވަނީ އިތުރުވެފައެވެ. މި މަގު މަރާމާތު ކުރުމުގެ މަސައްކަތް ހައުސިންގ މިނިސްޓްރީން އެމްޓީސީސީއާ ހަވާލުކޮށްފައިވަނީ ނިމިދިޔަ ޖޫން މަހުގެ ތެރޭގައެވެ. މަގުގެ މަރާމާތުގެ މަސައްކަތްތައް ކުރިއަށްދާއިރު، އެ ސަރަހައްދުގެ ޓްރެފިކް ފްލޯއަށް ބަދަލުތަކެއް ގެނެސް، ބައެއް ވަގުތުތަކުގައި މަގުން ބައެއް ބަންދުކުރަން ޖެހޭތީ އެކަމަށް ސަމާލުވުމަށް ފުލުހުންނާއި އެމްޓީސީސީން ވަނީ އިލްތިމާސްކޮށްފައެވެ. މި މަޝްރޫއުގެ މައިގަނޑު މަގުސަދަކީ މާލޭގެ މަގުތަކަކީ އާންމުންނަށް ދަތުރުފަތުރު ކުރުމުގައި އަމާން އަދި ލުއިފަސޭހަ ތަނަކަށް ހެދުމެވެ.
