ފަލަސްތީނުގެ ޣައްޒާގައި ސިއްހީ ހިދުމަތް ފޯރުކޮށްދޭ މަރުކަޒުތަކަށް އަމާޒުކޮށް އިޒްރޭލުން މެދުކެނޑުމެއްނެތި ދެމުންދާ ހަމަލާތައް ދިވެހިރާއްޖެއިން ވަގުތުން ކުށްވެރިކޮށްފިއެވެ.
ފޮރިން މިނިސްޓްރީން ނެރުނު ނޫސްބަޔާނެއްގައި ބުނީ، ޣައްޒާގެ ރައްޔިތުންނަށް ސިއްހީ ހިދުމަތްދޭ ތަންތަނާއި ވަސީލަތްތަކަށް އަމާޒުކޮށް އިޒްރޭލުން ދޭ ހަމަލާތަކަކީ ބައިނަލްއަގުވާމީ އިންސާނީ ހައްގުތަކާ ބެހޭ ގާނޫނުތަކާ ކަނޑައެޅިގެން ހިލާފު، ލާއިންސާނީ އަމަލުތަކެއް ކަމަށެވެ.
"މި ހަމަލާތަކުގައި މައުސޫމް އެތައް އަންހެނުންނާއި ކުޑަކުދިންގެ ފުރާނަ ގެއްލެމުންދާ ދިއުމަކީ ރާއްޖެއިން އިންތިހާއަށް ކަންބޮޑުވާކަމެއް. އަދި ސިއްހީ މަރުކަޒުތަކަށް ދޭ ހަމަލާތަކުގެ ސަބަބުން މަޝްރަހު ފިނިކުރުމަށް ކުރެވޭ މަސައްކަތްތަކަށް ބޮޑެތި ހުރަސްތަކެއް ކުރިމަތިވޭ." ފޮރިން މިނިސްޓްރީ
ރާއްޖެއިން ގޮވާލި މުހިންމު ކަންކަން
-
ގާނޫނުތަކަށް އިހުތިރާމްކުރުން: ބައިނަލްއަގުވާމީ ގާނޫނުތަކަށް އިހުތިރާމްކުރުމަށާއި، ހަމަލާތައް ހުއްޓާލުމުގެ އެއްބަސްވުންތަކަށް އަމަލުކުރުމަށް އިޒްރޭލަށް ގޮވާލުން.
-
ރައްކާތެރިކަން ކަށަވަރުކުރުން: ޣައްޒާގެ އާންމު ރައްޔިތުންނާއި، ސިއްހީ ހިދުމަތްތެރިންނާއި، އިންސާނީ އެހީ ފޯރުކޮށްދޭ ފަރާތްތަކަށް ފުރިހަމަ ރައްކާތެރިކަން ދިނުން.
-
އިންސާނީ އެހީ ފޯރުކޮށްދިނުން: އެއްވެސް ހުރަހެއް ނެތި ޣައްޒާއަށް ބޭނުންވާ އިންސާނީ އެހީ ފޯރުކޮށްދެވޭނެ މަގު ތަނަވަސްކޮށްދިނުން.
ފަލަސްތީނުގެ މިނިވަންކަމަށް ކުރާ މަސައްކަތުގައި ރާއްޖެ އަބަދުވެސް ސާބިތުކަމާއެކު އޮންނާނެ ކަމަށް ފޮރިން މިނިސްޓްރީން ވަނީ ތަކުރާރުކޮށްފައެވެ.
އެގޮތުން، 1967 ވަނަ އަހަރުގެ ކުރީގެ އިންތަކުގެ މައްޗަށް ބިނާކޮށް، އިރުމަތީ ގުދުސްއަކީ ވެރިރަށް ކަމުގައި ކަނޑައަޅައި، މިނިވަން އަދި މުސްތަގިއްލު ފަލަސްތީނު ދައުލަތެއް ގާއިމުކުރުމަށް ރާއްޖެއިން އަބަދުވެސް ވަކާލާތު ކުރާނެއެވެ.
