މޯލްޑިވްސް މެރިން ރިސާޗް އިންސްޓިޓިއުޓް (އެމްއެމްއާރްއައި) އިން އިންތިޒާމުކުރާ "6 ވަނަ މޯލްޑިވްސް މެރިން ސައިންސް ސިމްޕޯސިއަމް" ކުރިއަށް އޮތް އަންގާރަ ދުވަހު ބޭއްވުމަށް ނިންމާފިއެވެ.
ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) އާ ގުޅިގެން ކުރިއަށްދާ މި ސިމްޕޯސިއަމް އޮންނާނީ މިމަހުގެ 4 އިން 5 އަށް، އެ ޔުނިވާސިޓީގެ ސެންޓްރަލް އޯޑިޓޯރިއަމްގައެވެ. މި ބައްދަލުވުން ހުޅުވުމުގެ ރަސްމިއްޔާތު ޝަރަފުވެރިކޮށްދެއްވުމަށް ހަމަޖެހިފައިވަނީ މިނިސްޓަރ އޮފް ފިޝަރީޒް، އެގްރިކަލްޗާ އެންޑް އޯޝަން ރިސޯސަސް އަހުމަދު ޝިޔާމްއެވެ.
2016 ވަނަ އަހަރުން ފެށިގެން ކޮންމެ ދެ އަހަރުން އެއް އަހަރު ބާއްވަމުން އަންނަ މި ސިމްޕޯސިއަމްގެ މައިގަނޑު މަގްސަދަކީ ރާއްޖޭގެ ކަނޑުގެ ވަސީލަތްތަކާއި ދިރުންތަކާ ގުޅޭގޮތުން ކުރެވޭ ދިރާސާތަކުގެ ނަތީޖާ އާންމުންނާ ހިއްސާކުރުމާއި، ދާއިރާގެ ތަޖުރިބާކާރުންގެ މެދުގައި މައުލޫމާތު ބަދަލުކޮށް މެރިން ސައިންސް އިތުރަށް ކުރިއެރުވުމަށް މަގުފަހިކުރުމެވެ. ދެ ދުވަހުގެ މުއްދަތަށް ކުރިއަށްދާ މި ސިމްޕޯސިއަމްގައި ފަސް މައިގަނޑު ދާއިރާއަކުން ޖުމްލަ 47 ދިރާސާއެއް ހުށަހެޅޭނެއެވެ. އޭގެ ތެރޭގައި 32 އޯރަލް ޕްރެޒެންޓޭޝަނާއި 15 ޕޯސްޓާ ޕްރެޒެންޓޭޝަން ހިމެނެއެވެ.
މި ސިމްޕޯސިއަމްގައި އަލިއަޅުވާލެވޭނެ މައިގަނޑު ދާއިރާތަކުގެ ތެރޭގައި ކޮރަލް ރީފްސް އާއި ކްލައިމެޓް ޗޭންޖް، ފިޝަރީޒް އެންޑް ގަވަރނަންސް، ވެލާ ކަހަނބުގެ އިކޮލޮޖީ، އެންމަޑިއާއި މާކަނޑުގެ ދިރުންތައް، އަދި މޫދު އައްސޭރިފަށުގެ އިކޯސިސްޓަމްތައް ހިމެނެއެވެ. ރާއްޖޭގެ އެކި ޖަމިއްޔާތަކާއި ޔުނިވާސިޓީތަކުން ބައިވެރިވާ މި ބައްދަލުވުމަކީ ދިރާސާކުރާ ފަރާތްތަކާއި، ސިޔާސަތު އެކުލަވާލާ ފަރާތްތަކުގެ މެދުގައި ގުޅުން ބަދަލުކޮށް، އާ ކޮލާބޮރޭޝަންތަކަށް މަގުފަހިވެގެންދާނެ އަގުހުރި ފުރުސަތެއް ކަމަށް އެމްއެމްއާރްއައިއިން ބުނެއެވެ.
