މިއަދު އުދައަރާފާނެ ކަމަށް ލަފާކޮށް، މޫސުމާ ބެހޭ ގައުމީ އިދާރާ (މެޓް އޮފީސް) އިން މުޅި ރާއްޖެއަށް ހުދު ސަމާލު (ވައިޓް އަލާޓް) ނެރެފިއެވެ. ރާއްޖޭގެ އުތުރުން ދެކުނަށް ހިމެނޭ ހުރިހާ ސަރަޙައްދަކަށް މިއަދު ސަމާލު ނެރެފައިވަނީ 11:30 އިން 15:30 އަށެވެ.
މެޓް އޮފީހުން ވިދާޅުވި ގޮތުގައި، ކަނޑުތައް އާދައިގެ ވަރަކަށް މަޑުވި ނަމަވެސް، ރާޅު ބާނިތަކުގެ އުސްމިން މަތިވާނެއެވެ. އަދި ދިޔަވަރު ބޮޑުވާ ވަގުތުތަކުގައި ރަށްތަކަށް އުދައެރުމުގެ ފުރުޞަތު ބޮޑުކަމަށް ވަނީ ލަފާކޮށްފައެވެ.
މޫސުން ލަފާކުރާ ގޮތުގެ ތަފްސީލު:
-
ރާޅުގެ އުސްމިން: 2 ފޫޓާއި 5 ފޫޓާ ދެމެދު.
-
ދެކުނުގެ އަތޮޅުތަކަށް ވައި: އިރުދެކުނާއި ދެކުނުން ގަޑިއަކު 3 މޭލާއި 13 މޭލާ ދެމެދުގެ ބާރުމިނުގައި.
-
އެހެން ހިސާބުތަކަށް ވައި: ހުޅަނގުދެކުނާއި ހުޅަނގުން ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި.
-
ވިލާގަނޑުގައި ވައި: ގަޑިއަކު ގާތްގަނޑަކަށް 30 މޭލަށް ވައި ގަދަވުން އެކަށީގެންވޭ.
ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރުކުރުން އެކަށީގެންވާތީ، ގެއްލުންތަކުން ރައްކާތެރިވުމަށާއި މުދަލަށް ސަމާލުވުމަށް ކަމާބެހޭ އިދާރާތަކުން އިލްތިމާސްކުރައްވައެވެ.
