މި މަހުގެ 19 ވަނަ ދުވަހުގެ ރޭ ތިލަފުށީގައި ހިނގި އަލިފާނުގެ ހާދިސާގައި އެނދި ކުނިތައް ހދ. ކުނބުރުދުއަށް ގެންދިއުމަށް ވެމްކޯއިން ނިންމި ނިންމުމާ ގުޅިގެން، ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފިއެވެ. ވައިކަރަދޫ ދާއިރާގެ މެމްބަރު ހުސެއިން ޒިޔާދު (ފިއްޓޭ) ހުށަހެޅުއްވި މި މައްސަލަ ބޭރުކޮށްލީ ޖަލްސާގައި ބައިވެރިވެވަޑައިގެންނެވި 34 މެމްބަރުންގެ ތެރެއިން 27 މެމްބަރުންގެ ވޯޓުންނެވެ. މި މައްސަލައާ އެއްކޮޅަށް ވޯޓު ދެއްވީ 7 މެމްބަރުންނެވެ.
ކުއްލި މައްސަލައިގައި ފާހަގަކޮށްފައިވާ މުހިންމު ކަންކަން:
-
ނުނިމި ހުރި ވަސީލަތްތައް: ކުނބުރުދޫގައި ގާއިމުކުރާ ވޭސްޓް ޓްރާންސްފާ ސްޓޭޝަނަކީ މަސައްކަތް އެއްކޮށް ނިމިފައިވާ ތަނެއް ނޫނެވެ. އަދި ކޮންކްރީޓް ފަންގިފިލާއެއް ނެތުމުން، ކުނިން އުފެދޭ ވިހަ ފެން ("ލީޗޭޓް") ރައްކާތެރިކަމާއެކު ޖަމާކޮށް ނައްތާލެވޭނެ ނިޒާމެއް އެ ރަށުގައި ނެތެވެ.
-
ތިމާވެށީގެ ނުރައްކާ: ކުނބުރުދުއަކީ ރާއްޖޭގައި ހިމާޔަތްކޮށްފައިވާ "ކަންޒު ކަހަނބު" އާލާވެ ދިރިއުޅޭ ނާޒުކު މާހައުލެއް އޮތް ރަށަކަށްވާއިރު، ތިލަފުށިން ގެންދާ ވިހަ ކުނިތަކުގެ ސަބަބުން މި ދިރުންތައް ނެތިދިއުމުގެ ބިރު ބޮޑެވެ.
-
ފަސްގަނޑާއި ފެން ތަޣައްޔަރުވުން: ވިހަ މާއްދާތައް ބިމުގެ ފަސްގަނޑަށާއި ފެން ފަށަލައަށް ޖަމާވުމުގެ ސަބަބުން، ރަށުގެ ގުދުރަތީ ރީތިކަން ގެއްލި ދަނޑުވެރިކަމަށާއި ގަސްގަހާގެއްސަށް އިއާދަނުކުރެވޭނެ ބޮޑެތި ގެއްލުންތަކެއް ކުރިމަތިވެދާނެއެވެ.
-
އުސޫލާ ޚިލާފުވުން: ކުނބުރުދުއަކީ ކުނި ޓްރާންސްފާކުރާ ރަށެއްގެ ގޮތުގައި އޮތް ނަމަވެސް، ތިލަފުށީގެ އެނދި ކުނިތައް އެ ރަށަށް ޖަމާކުރަމުންދަނީ ކަނޑައެޅިފައިވާ އުސޫލުތަކާ ޚިލާފަށެވެ.
މި މައްސަލަ މަޖިލީހުން ބޭރުކޮށްލާފައިވާއިރު، މިއީ އެ ސަރަހައްދުގެ ރައްޔިތުންގެ ސިއްހަތަށާއި، ތިމާވެއްޓަށް އަދި މުޅި ގުދުރަތީ ނިޒާމަށް ބޮޑެތި ގެއްލުންތަކެއް ލިބިދާނެ ކަމެއްގެ ގޮތުގައި މައްސަލައިގައި ސިފަކޮށްފައިވެއެވެ.
