ކަނޑުއޮތްގިރީގައި ޤާއިމުކޮށްފައިވާ 25 ޓަނުގެ އައިސް ޕްލާންޓުން މަސްވެރިންނަށް އައިސް ވިއްކުމުގެ ޚިދުމަތް މިއަދު ވަނީ ރަސްމީކޮށް ފަށާފައެވެ.
ކަނޑުއޮތްގިރިން އައިސް ލިބޭނެ އިންތިޒާމު ހަމަޖެހިގެން ދިއުމަކީ މާލެ ސަރަޙައްދުގައި ހަރަކާތްތެރިވާ މަސްވެރިންނާއި، ޚާއްޞަކޮށް ކަންނެލި މަސްވެރިންނަށް އައިސް ހޯދުމުގައި ދިމާވަމުންދިޔަ ދަތިތަކަށް ބޮޑު ލުޔެއް ލިބިގެންދާނެ ކަމެކެވެ. މިއާއެކު، އައިސް ހޯދުމަށް ކުރަންޖެހޭ ދިގު ދަތުރުތަކަށް ނިމުމެއް އައިސް، ވަގުތާއި ހޭދަވާ ޚަރަދު ކުޑަވެގެންދާނެއެވެ.
ކަނޑުއޮތްގިރިން މިއަދު ވަނީ މަސްވެރިންނަށް އައިސް ވިއްކަން ފަށާފައި. ކަނޑުއޮތްގިރިން އައިސް ލިބުމަކީ މާލެ ސަރަހައްދުގެ މަސްވެރިންނަށް ލިބިގެންދިޔަ ވަރަށް ބޮޑު ފަސޭހައެއް. 25 ޓަނުގެ މި އައިސް ޕްލާންޓާ އެކު ކަނޑުއޮތްގިރީގައި މިމަހު ވަނީ ހިކިމަސް ފެކްޓަރީއެއް ވެސް ހުޅުވާފައި. pic.twitter.com/ktBioxQH8X
— MIFCO (@mifcomv) July 27, 2026
މި އައިސް ޕްލާންޓުގެ އިތުރުން، މަސްވެރިކަމުގެ ސިނާޢަތް ފުޅާކޮށް މަހުގެ ނަފާ އިތުރުކުރުމުގެ މަޤްޞަދުގައި ކަނޑުއޮތްގިރީގައި ތަރައްޤީކުރި ހިކިމަސް ފެކްޓަރީ ވެސް މިމަހުގެ ތެރޭގައި ވަނީ ހުޅުވާފައެވެ.
މިފްކޯގެ ބެލުމުގެ ދަށުން ހިންގާ ކަނޑުއޮތްގިރި ފިޝް ޕްރޮސެސިންގ ކޮމްޕްލެކްސް އަކީ މާލެ ސަރަޙައްދުގެ މަސްވެރިން ބޭނުންކުރާ އުޅަނދުފަހަރަށް ބޭނުންވާ ޚިދުމަތްތައް އެއްފުރާޅެއްގެ ދަށުން ފޯރުކޮށްދިނުމަށް ތަރައްޤީކުރަމުންދާ މަރުކަޒެކެވެ.
މި ފެކްޓަރީއާއި އައިސް ޕްލާންޓާއެކު، މަސްވެރިން ބާނާ މަހަށް ހަމަ އަގު ހޯދައިދިނުމަށާއި، ރާއްޖެއިން ބޭރަށާއި އެތެރޭގެ މާރުކޭޓަށް ފެންވަރު ރަނގަޅު މަހުގެ އުފެއްދުންތައް ފޯރުކޮށްދިނުމަށް ކުރެވޭ މަސައްކަތްތަކަށް ބޮޑު ކުރިއެރުމެއް ލިބިގެންދާނެއެވެ.
