ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން އަތޮޅުތެރޭގެ ރަށްރަށުގައި ކުރިއަށްގެންދާ މަޝްރޫޢުތަކުގެ ސްޕީޑް އަވަސްކުރުމަށާއި، މަސައްކަތްތައް ހިނގަމުންދާ ގޮތް ގާތުން ބެލުމަށް ކުރަމުންދާ ދަތުރުގެ ތެރެއިން އެ ކޯޕަރޭޝަންގެ އިސްވެރިންތަކެއް ތ. ގުރައިދޫއަށް އަދި ވޭމަންޑޫއަށް ޒިޔާރަތްކޮށްފިއެވެ.
އެ ކޯޕަރޭޝަނުގެ އިސްވެރިން ފައްޓަވާފައިވާ މި ދަތުރުފުޅުތަކުގެ ތެރެއިން، ޑެޕިއުޓީ މެނޭޖިންގ ޑައިރެކްޓަރ މުހައްމަދު ނަބީޙް އަފީފް އަދި ކުންފުނީގެ އިސް ވަފުދެއް ތ. ގުރައިދޫ އަދި ވޭމަންޑޫއަށް ވަނީ ޒިޔާރަތްކުރައްވާފައެވެ.
މި ޒިޔާރަތުގައި ގުރައިދޫގައި އާރުޑީސީން ކުރިއަށްގެންދާ މަޝްރޫޢުގެ ޢަމަލީ މަސައްކަތްތައް ކުރިއަށްދާ ގޮތް ވަނީ ވަރަށް ގާތުން ބައްލަވާލައްވާފައެވެ. އަދި މަޝްރޫޢުގެ އެންމެ ފަހުގެ މަޢުލޫމާތުތައް އަދާހަމަކުރެއްވުމަށާއި، ދިމާވާ ގޮންޖެހުންތައް ދެނެގަތުމަށްޓަކައި އެރަށުގައި މަސައްކަތްކުރާ އާރުޑީސީގެ މުވައްޒަފުންނާ ބައްދަލުކުރައްވައި ޚިޔާލު ބަދަލުކުރައްވާފައިވެއެވެ.
ތ. ގުރައިދޫ މަގުހެދުމުގެ ބޮޑު މަޝްރޫޢަކީ އެރަށުގެ ރައްޔިތުންނަށް ދިމާވެފައިވާ ކަނޑުގަދަވުމާއި ފެންބޮޑުވުމުގެ މައްސަލަތަކަށް ދާއިމީ ޙައްލެއް ހޯދައިދިނުމަށް ސަރުކާރުން އާރުޑީސީއާ ޙަވާލުކޮށްގެން ކުރިއަށްގެންދާ މުހިންމު މަޝްރޫޢެކެވެ. މި މަޝްރޫޢުގެ ދަށުން ގުރައިދޫގެ ބޮޑެތި ހުރިހާ މަގުތަކެއްގައި ތާރުއެޅުމުގެ މަސައްކަތް ކުރުމަށް ވަނީ ހަމަޖެހިފައެވެ. މީގެ އިތުރުން މަގުތަކުގައި ފެންބޮޑުވާ މައްސަލަ ޙައްލުކުރުމަށްޓަކައި ޒަމާނީ ފެންހިންދާ ނިޒާމެއް ޤާއިމުކުރުމާއި، މަގުބައްތި ހަރުކުރުމުގެ އިތުރުން ޓްރެފިކް ނިޝާންތައް ހަރުކުރުމުގެ މަސައްކަތް ވެސް މި މަޝްރޫޢުގެ ތެރެއިން ކުރިއަށްދާނެއެވެ.
ގުރައިދޫގެ އިތުރުން، މި ވަފުދުން ވަނީ ތ. އަތޮޅުގެ ވެރިކަން ކުރާ ރަށް، ވޭމަންޑޫއަށް ޒިޔާރަތްކޮށް އެރަށުގެ މަގުތައް ޒަމާނީ ފެންވަރަށް ހެދުމަށް ހިންގާ މަޝްރޫޢުގެ ސައިޓްތަކަށް ޒިޔާރަތްކޮށްފައެވެ. ވޭމަންޑޫ މަގުހެދުމުގެ މަޝްރޫޢުގެ ދަށުން އެރަށުގެ މައިގަނޑު ހުރިހާ މަގުތަކެއްގައި ތާރުއަޅައި، މަގުތަކުގެ ސަލާމަތީ ކަންކަން ވަރުގަދަކުރުމަށް ވަނީ ރޭވިފައެވެ. މިގޮތުން މަގުތަކުގެ ދުވާރު ހެދުމާއި، ކޭބަލް ޖަންކްޝަންތައް ވަޅުލުމުގެ މަސައްކަތްތައް މިހާރު ދަނީ ކުރިއަށެވެ. އަދި ވިއްސާރަ ދުވަސްވަރު ވޭމަންޑޫގެ މަގުތަކުގައި ފެންބޮޑުވެ، ރައްޔިތުންނަށް ދިމާވާ ދަތިތަކަށް ޙައްލެއް ހޯދައިދިނުމަށްޓަކައި ސްޓޯމްވޯޓަރ ޑްރައިނޭޖް ސިސްޓަމް ޤާއިމުކުރުމުގެ މަސައްކަތް ވެސް އާރުޑީސީން ދަނީ ބާރުމިނެއްގައި ކުރަމުންނެވެ.
އާރުޑީސީގެ މެނޭޖްމަންޓުން ވިދާޅުވި ގޮތުގައި، މި ދަތުރުފުޅުގެ މައިގަނޑު ބޭނުމަކީ ރަށްރަށުގައި ހިންގާ މަޝްރޫޢުތައް ކަނޑައެޅިފައިވާ ތާވަލާ އެއްގޮތަށް، އެންމެ މަތީ ފެންވަރުގައި ނިންމާލުމަށް ބޭނުންވާ އެހީތެރިކަން ސައިޓްތަކަށް ފޯރުކޮށްދިނުމެވެ.
ގުރައިދޫގެ މުވައްޒަފުންނާއެކު ބޭއްވުނު ބައްދަލުވުމުގައި ޑީއެމްޑީ ނަބީޙް ވަނީ މުވައްޒަފުން ކުރަމުންދާ ބުރަ މަސައްކަތް ފާހަގަކުރައްވައި ހިތްވަރު ދެއްވާފައެވެ. މި މަޝްރޫޢު ނިމުމުން ގުރައިދޫގެ އިޖުތިމާޢީ އަދި އިޤްތިޞާދީ މޫނުމަތި ބަދަލުވެ، ރަށުގެ ދަތުރުފަތުރުގެ ނިޒާމަށް ބޮޑު ލުޔެއް ލިބިގެންދާނެ ކަމަށް އާރުޑީސީން ހާމަކުރެއެވެ.
