ރާއްޖެއަށް ބޭނުންވާ ބޭހުގެ ބާވަތްތަކާއި އޭގެ އަދަދު ދުރާލާ ދެނެގަނެވޭނެ ހަރުދަނާ ނިޒާމެއް ޤާއިމުކޮށް، ބޭސް ލިބުމުގައި ދިމާވާ ދަތިތަކަށް ދާއިމީ ހައްލެއް ހޯދުމުގެ މަސައްކަތް ސްޓޭޓް ފާމަސޫޓިކަލްސް އެންޑް މެޑިކަލް ސަޕްލައި ކޯޕަރޭޝަނުން ފަށައިފިއެވެ.
ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން އެ ކުންފުނީގެ މެނޭޖިންގ ޑިރެކްޓަރ ޑރ. ޝާހު މާހިރު ވިދާޅުވީ، ބޭސް ހުސްވުމުގެ މައްސަލަ މުލުން قطﻊ ކުރެވެން އޮތީ ރާއްޖެއަށް ބޭނުންވާ ބޭހުގެ ޑިމާންޑް ކުރިއާލާ އެނގިގެން ކަމަށެވެ. އެގޮތުން މިކަމަށްޓަކައި ޤާއިމުކުރާ "އެންޓަޕްރައިސް ރިސޯސް މެނޭޖްމަންޓް" އަދި "އީ-ލޮޖިސްޓިކްސް" ސިސްޓަމްގެ ފުރަތަމަ ފިޔަވަހީގެ މަސައްކަތް މިހާރު ވަނީ ކާމިޔާބުކަމާއެކު ނިންމާލާފައެވެ.
އާ ނިޒާމާ ބެހޭގޮތުން އިތުރަށް ތަފްޞީލު ދެއްވަމުން ޑރ. ޝާހު ވިދާޅުވީ، މި ސިސްޓަމްގެ އެހީގައި ކުދި އާބާދީތައް އެކުލެވޭ ރަށްރަށުގައި ވަކިވަކި ބަލިތަކަށް (މިސާލަކަށް ހަކުރުބަލި) ބޭސް ބޭނުންކުރާ މީހުންގެ އަދަދު ސީދާ އެނގެން ހުންނާނެ ކަމަށެވެ. މީގެ ސަބަބުން، ކުރިއަށް އޮތް އަހަރު ދުވަހަށް ރާއްޖެއަށް ބޭނުންވާނެ ބޭހުގެ މިންވަރު އަންދާޒާކޮށް، ފެންވަރު ރަނގަޅު ބޭސް މެދުނުކެނޑި އެ ރަށްރަށަށް ސްޓޮކް ކުރެވޭނެ މަގު ފަހިވެގެންދާނެއެވެ. ނަތީޖާއެއްގެ ގޮތުން ކޮންމެ ރައްޔިތަކަށްވެސް ބޭނުންވާ ވަގުތު ބޭސް ލިބޭނެކަމުގެ ފުރިހަމަ ކަށަވަރުކަން ލިބިގެންދާނެއެވެ.
މި ޑިޖިޓަލް ނިޒާމުގެ ހުރިހާ މަސައްކަތްތަކެއް އަންނަ ސެޕްޓެމްބަރު މަހުގެ ތެރޭގައި އެއްކޮށް ނިންމާލެވޭނެ ކަމަށް ޑރ. ޝާހު ފާހަގަކުރެއްވިއެވެ. މީގެއިތުރުން، މިވަގުތު ބާޒާރުން މަދުވެގެން ނުވަތަ ނެތް ކަމަށް ރިޕޯޓްކޮށްފައިވާ ބޭސްތައް ގެނައުމަށް ޚާއްޞަ އިސްކަމެއް ދީގެން މަސައްކަތް ކުރަމުންދާ ކަމަށާއި، ނުލިބި ހުރި ގިނަ ބޭސްތަކެއް ކުރިއަށް އޮތް ދެ ހަފުތާއެއްހާ ދުވަހުގެ ތެރޭގައި ރާއްޖެއަށް އެތެރެކުރެވޭނެ ކަމުގެ އުފާވެރި ޚަބަރު ވެސް އެމްޑީ ދެއްވިއެވެ.
ސިއްހީ ދާއިރާ ހަރުދަނާކުރުމަށް މި ސަރުކާރުން ގެންގުޅޭ ސިޔާސަތުގެ ދަށުން ތައާރަފުކުރާ މި އާ ނިޒާމަކީ، ދިވެހި ރައްޔިތުންނަށް ފެންވަރު ރަނގަޅު ބޭސް އެއްވެސް މެދުކެނޑުމެއް ނެތި، ފަސޭހަކަމާއެކު ފޯރުކޮށްދިނުމަށްޓަކައި އެޅިގެންދާ އެންމެ މުހިންމު އަދި އިންގިލާބީ ފިޔަވަޅު ކަމުގައި އެ ކުންފުނިން ދެކެއެވެ.
