ހުޅުމާލެ ދެވަނަ ފިޔަވަހީގެ އަމާން އުދަރެސް ފްލެޓު ސަރަޙައްދުގައި އަލަށް އިމާރާތްކުރަމުންދާ މިސްކިތުގެ 85 އިންސައްތަ މަސައްކަތް މިހާރު ނިމިފައިވާ ކަމަށް އިސްލާމީ ކަންތައްތަކާއި އައުޤާފާ ބެހޭ ވުޒާރާއިން ހާމަކޮށްފިއެވެ.
މިއީ އެއްފަހަރާ 1,800 އެއްހާ މީހުންނަށް ނަމާދު ކުރެވޭނެ ފަދަ ތަނަވަސް ޖާގައަކާއެކު ބިނާކުރަމުންދާ ޒަމާނީ މިސްކިތެކެވެ. ހުޅުމާލޭގެ ދެވަނަ ފިޔަވަހީގައި އަލަށް އާބާދުވަމުންދާ ރައްޔިތުންނަށް ދިމާވެފައިވާ މިސްކިތްތަކުގެ ދަތިކަން ޙައްލުކުރުމަށް ސަރުކާރުން ކުރިއަށްގެންދާ މަޝްރޫޢުތަކުގެ ތެރެއިން، މި މިސްކިތުގެ މަސައްކަތް ވަރަށް ހަލުވިކަމާއެކު ކުރިއަށްދާކަން ވުޒާރާއިން ފާހަގަކުރެއެވެ.
ހުޅުމާލެ ދެވަނަ ފިޔަވަހީގެ އަމާން އުދަރެސް ފްލެޓު ސަރަޙައްދުގައި ބިނާކުރާ މިސްކިތުގެ 85 އިންސައްތަ މަސައްކަތް މިހާރު ވަނީ ނިމިފައި. މިއީ 1800 މީހުންގެ ޖާގައިގެ މިސްކިތެއް.@MMuizzu@presidencymv@Mohamedshaheem1 pic.twitter.com/fJXVRgX9LX
— Ministry of Islamic Affairs & Endowments (@MVIaffairs) July 16, 2026
މި މަޝްރޫޢަކީ ހުޅުމާލެ ފޭސް 2 ގައި ހުންނަ "ގެދޮރުވެރިޔާ" ސޯޝަލް ހައުސިންގ ޓަވަރުތައް ނުވަތަ "އަމާން އުދަރެސް" ފްލެޓުތަކުގައި ދިރިއުޅޭ ރައްޔިތުންނަށް ފަސޭހަކަމާއެކު އަޅުކަން ކުރެވޭނެ މަގު ތަނަވަސްކޮށްދިނުމަށް ފެށި މަޝްރޫޢެކެވެ. މި ސަރަހައްދުގެ އިތުރުން ހުޅުމާލެ ވިނަރެސް ފްލެޓު ސަރަހައްދުގައިވެސް 1,095 މީހުންގެ ޖާގައިގެ ދާއިމީ މިސްކިތެއް ބިނާކުރުމުގެ މަސައްކަތް ބާރަށް ކުރިއަށްދާކަން ސަރުކާރުން ހާމަކުރެއެވެ. މިހާރު ދެވަނަ ފިޔަވަހީގައި ދާއިމީ ތިން މިސްކިތަކާއި ވަގުތީ ދެ މިސްކިތެއް ބޭނުންކުރަމުންދާއިރު، އާބާދީ އިތުރުވަމުންދާ މިންވަރަށް ބަލައި އިތުރު މިސްކިތްތަކާއި އިސްލާމީ މަރުކަޒުތައް ބިނާކުރުމަށް ބޮޑު އިސްކަމެއް ދެމުންދާ ކަމަށް އިސްލާމީ ކަންތައްތަކާ ބެހޭ ވުޒާރާއިން މައުލޫމާތުދެއެވެ.
