ސަރުކާރުން ފޮނުވި ގޮތަށް އެއްވެސް އިތުރު ބަދަލެއް ނުގެނެސް، ސިނގިރޭޓުގެ އަގު ކުޑަކުރާ ގޮތަށް ގާނޫނަށް އިސްލާހު ގެނައުމުގެ ބިލު މުޅި މަޖިލީހުގެ ކޮމިޓީން މިއަދު ފާސްކޮށްފިއެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހަޅުއްވީ ކޮމަންޑޫ ދާއިރާގެ ޕީއެންސީ މެންބަރު މުހައްމަދު އިބްރާހިމް އެވެ. ބިލާ ގުޅޭގޮތުން މަޖިލީހުގައި ނެގުނު ވޯޓުތަކުގެ ތަފްސީލަކީ:
-
މަޖިލީހަށް ބަލައިގަތުން: ބިލުގެ އިބުތިދާއީ ބަހުސް ނިންމައި މަޖިލީހަށް ބަލައިގަތުމަށް ފާސްވީ ވޯޓުގައި ބައިވެރިވެވަޑައިގެންނެވި 49 މެންބަރުންގެ އިއްތިފާގުންނެވެ.
-
ކޮމިޓީން ފާސްވުން: ބިލު އިތުރަށް ދިރާސާކުރުމަށް މުޅި މަޖިލީހުގެ ކޮމިޓީއަށް ފޮނުވުމަށްފަހު، މެންބަރުންގެ ހިޔާލާއެކު ނެގުނު ވޯޓުގައި ބައިވެރިވެވަޑައިގެންނެވި 69 މެންބަރުންގެ ވޯޓާއެކު ބިލު ވަނީ އޮތްގޮތަށް ފާސްކުރުމަށް ނިންމާފައެވެ.
މި ބިލަށް މަޖިލީހުގެ ޖަލްސާގައި ކުރެވުނު ބަހުސްތައް ވަރަށް ބޮޑަށް ހޫނުވެގެންދިޔަކަން ފާހަގަކުރެވެއެވެ. އެގޮތުން ބަހުސްގެ ތެރޭގައި ސިޔާސީ އެކި ޕާޓީތަކުގެ މެދުގައި ބަހުގެ ހަމަލާތައް ބަދަލުކުރެވި، އެއް ބަޔަކު އަނެއް ބަޔަކަށް ވައްކަމުގެ ބޮޑެތި ތުހުމަތުތައް ވެސް ކޮށްފައިވެއެވެ.
ބިލުގެ ކޮމިޓީ މަރުހަލާގެ އެންމެހާ މަސައްކަތްތައް މިއަދު ނިމިފައިވާއިރު، ދެން އޮތީ މަޖިލީހުގެ ތަޅުމުން މި ބިލު މުޅިނުކޮށް ފާސްކުރުމަށް ނަގާ ފަހުގެ ވޯޓެވެ. ބެލެވޭ ގޮތުގައި މާދަމާ އޮންނަ މަޖިލީހުގެ ރަސްމީ ޖަލްސާގައި މި ބިލަށް ވޯޓަށް އަހާނެއެވެ.
