ޑައިމޯފިން ޓްރެފިކްކުރުމުގެ ކުށް ސާބިތުވެ، ދިވެހި ފިރިހެނަކު 25 އަހަރުގެ މުއްދަތަށް ޖަލަށްލުމާއެކު އެއް ލައްކަ ރުފިޔާއިން ޖޫރިމަނާކުރުމަށް ކޯޓުން ހުކުމްކޮށްފިއެވެ.
މި މައްސަލާގައި ކޯޓުން ހުކުމް އިއްވާފައިވަނީ ށ. މިލަންދޫ / ސުނީތާހައުސް، ޢަލީ އިބްރާހީމް (37އ) ގެ މައްޗަށެވެ. އޭނާގެ މައްޗަށް ކުށް ސާބިތުވެ، ކޯޓުން މި ހުކުމް އިއްވާފައިވަނީ 21 ޖޫން 2026 ގައެވެ.
ޢަލީ އިބްރާހީމްގެ މައްޗަށް މި ދައުވާ އުފުލައި ހުކުމް އިއްވާފައިވަނީ މަސްތުވާތަކެއްޗާބެހޭ ގާނޫނު) ގެ 105 ވަނަ މާއްދާގެ ދަށުންނެވެ.
މައްސަލައިގެ ތާރީޚީ ތަފްސީލު:
-
ފުލުހަށް ހުށަހެޅުން: މި މައްސަލަ ފުލުހުންގެ ޚިދުމަތަށް ރަސްމީކޮށް ހުށަހަޅާފައި ވަނީ 12 ޖަނަވަރީ 2023 ގައެވެ.
-
ޕީޖީ އޮފީހަށް ފޮނުވުން: މައްސަލައިގެ ތަހުގީގު ފުރިހަމަކޮށް ނިންމުމަށްފަހު، އޭނާގެ މައްޗަށް ދައުވާ އުފުލައިދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވަނީ 13 މާރިޗު 2023 ގައެވެ.
ފުލުހުން ހާމަކުރި ގޮތުގައި، މި ކާމިޔާބީއަކީ މަސްތުވާތަކެއްޗާ ދެކޮޅަށް، ކަމާ ގުޅުންހުރި މުއައްސަސާތަކާ ގުޅިގެން ފުލުހުން ކުރަމުންދާ ސިލްސިލާ މަސައްކަތްތަކުގެ ތެރެއިން ލިބުނު މުހިންމު ނަތީޖާއެކެވެ. އަދި މަސްތުވާތަކެތީގެ ވިޔަފާރިކުރާ ފަރާތްތަކާ މެދު ގާނޫނީ ގޮތުން އެޅެން އޮތް އެންމެ ހަރުކަށި ފިޔަވަޅު އެޅުމަށް ދިވެހި ފުލުހުންގެ ޚިދުމަތުން ހާއްސަ އިސްކަމެއް ދީގެން އަބަދުވެސް މަސައްކަތް ކުރަމުންދާނެ ކަމަށް ފުލުހުން ބުނެފައިވެއެވެ.
