ޙައްޖުގެ މަތިވެރި އަޅުކަން އަދާކުރުމަށްފަހު، މިއަހަރު ރާއްޖެއިން ހައްޖަށް ދިޔަ ޙައްޖާޖީންގެ އެންމެ ފަހު ގްރޫޕް އެނބުރި ރާއްޖެއަށް އައުމަށް ފުރައިފިއެވެ.
ޤައުމީ އެއަރލައިން، މޯލްޑިވިއަންގެ ޚާއްޞަ ފްލައިޓެއްގައި މި ހައްޖާޖީން ސައުދީ އަރަބިއްޔާގެ މަދީނާއިން ފުރާފައިވަނީ އެޤައުމުގެ ގަޑިން ރޭ ދަންވަރު 03:23 ގައެވެ. މި ފްލައިޓް ރާއްޖޭގެ ވެލާނާ އިންޓަރނޭޝަނަލް އެއަރޕޯޓަށް ޖެއްސުމަށް ތާވަލުކޮށްފައިވަނީ މިރޭ ދަންވަރު 12:00 ހާއިރުއެވެ. މި ދަތުރުގައި ޖުމްލަ 262 ޙައްޖާޖީން ބައިވެރިވެއެވެ.
މިއީ މިއަހަރުގެ ޙައްޖުގެ އަޅުކަމަށްފަހު ޙައްޖާޖީން އަންނަ ހަތަރުވަނަ ފްލައިޓެވެ. އަދި މިއީ މޯލްޑިވިއަންގެ ފްލައިޓެއްގައި ޙައްޖާޖީން އަންނަ ދެވަނަ ފްލައިޓްވެސް މެއެވެ. މި ފްލައިޓާއެކު، މޯލްޑިވްސް ޙައްޖު ކޯޕަރޭޝަންގެ ހަވާލުގައި މިއަހަރު ޙައްޖަށް ދިޔަ ހުރިހާ ޙައްޖާޖީން ރާއްޖެއަށް އައިސް ނިމޭނެއެވެ.
ސައުދީ އަރަބިއްޔާގައި ތިން ހަފުތާގެ މުއްދަތެއް ހޭދަކުރުމަށްފަހު ޙައްޖާޖީން އެނބުރި އަންނައިރު، މައްކާގައި ޙައްޖުގެ މަނާސިކުތައް ފުރިހަމަކުރުމަށްފަހު، އެންމެ ފަހުން ފުރި ގްރޫޕް ވަނީ މަދީނާގައި ދެ ދުވަސް މަޑުކޮށް ކައު އިތުރު ރަސޫލާ ﷺ ގެ މިސްކިތްކޮޅަށް ޒިޔާރަތްކޮށްފައެވެ.
މިއަހަރު ރާއްޖެއިން ޙައްޖަށް ދިޔަ ހުރިހާ ޙާޖީންގެ ޙާލުވެސް އާންމުގޮތެއްގައި ރަނގަޅުކަމަށް ޙައްޖު ކޯޕަރޭޝަނުން މައުލޫމާތުދެއެވެ. އެހެން އަހަރުތަކާ ޚިލާފަށް މިއަހަރު ދިވެހި ޙައްޖާޖީންނަށް ސައުދީގައި ދެވުނު ޚިދުމަތްތައް އިތުރަށް ހަރުދަނާކޮށްފައިވާކަން ފާހަގަކުރެވެއެވެ.
