މާލޭގެ ހުސްބިންތަކުގައި ދިވެހި ބޭސްވެރިކަމަށް ބޭނުންވާ ގަސްތައް އިންދުމަށް މާލޭ ސިޓީ ކައުންސިލުން މިއަދު ނިންމައިފިއެވެ.
މިއަދު ބޭއްވި ކައުންސިލްގެ ޖަލްސާއަށް މާލޭގެ މޭޔަރު އާދަމް އާޒިމް ފުރަތަމަ ހުށަހެޅުއްވީ، މާލޭގެ ގަބުރުސްތާނުތަކުގައި ހުރި ހުސް ޖާގަތަކުގައި ދިވެހި ބޭސްވެރިކަމަށް ބޭނުންވާ ގަސްތައް އިންދުމަށެވެ. މޭޔަރު ފާހަގަކުރެއްވި ގޮތުގައި، ދިވެހި ބޭސްވެރިކަން ކުރާ ފަރާތްތަކަށް ބޭނުންވާ ފަތްޕިލާވެލި މާލެއިން ލިބުމުގައި ބޮޑެތި ދަތިތަކެއް ހުރިކަމުގެ ޝަކުވާ އެ ފަރާތްތަކުން ދަނީ ކުރަމުންނެވެ.
އަދި ގަބުރުސްތާނުތަކުގައި މިފަދަ ގަސްތައް އިންދުމަކީ ދީނީ ގޮތުން އެއްވެސް އުޒުރެއް އޮތް ކަމެއް ނޫންކަން ސާފުކުރައްވާފައިވާ ކަމަށާއި، ގަލޮޅު ސަހަރާ ފަދަ ތަންތަނުގައި މިކަމަށް އެކަށީގެންވާ ހުސް ޖާގަ އެބައޮތް ކަމަށްވެސް ވިދާޅުވިއެވެ.
ނަމަވެސް، މީހުން ވަޅުލާފައިވާ ގަބުރުސްތާނުތަކުގައި މިފަދަ ގަސްތައް އިންދުމާ މެދު ބައެއް ކައުންސިލަރުންގެ މެދުގައި ހިޔާލު ތަފާތުވުންތަކެއް އުފެދުނެވެ. ކައުންސިލަރުން ފާހަގަކުރެއްވި ބައެއް ކަންބޮޑުވުންތަކުގެ ތެރޭގައި:
- މީހުން ވަޅުލާފައިވާ ތަންތަނުގައި މިފަދަ ގަސްތައް އިންދުމަކީ އެންމެ އެކަށީގެންވާ ކަމަކަށް ނުވުން.
- ވަކި އުސޫލެއް ނެތި އަދި ބެލެހެއްޓުންތެރިކަމެއް ނެތި ގަސްތައް އިންދައިފި ނަމަ، ވަކި ބަޔަކު އެ ގަސްތަކުގެ މައްޗަށް ބާރު ފޯރުވައި، އޭގެ މަންފާ އާންމު ރައްޔިތުންނަށް ހަމަހަމަކޮށް ނުލިބުމުގެ ފުރުސަތު އޮތުން.
- މިހާރުވެސް ބައެއް ބިދޭސީން ގަސްތައް އުފުރައިގެން އޭގެ ވިޔަފާރި ކުރަމުންދާ އިރު، އެކަށީގެންވާ ބެލެހެއްޓުމެއް ނެތި މިކަން ކޮށްފި ނަމަ، ދިވެހިންނަށް އޭގެ ހަގީގީ މަންފާ ނުލިބި ބިދޭސީން އޭގެ ނާޖާއިޒު ފައިދާ ނެގުމުގެ ބިރު އޮތުން.
މި ބަހުސްތަކަށްފަހު، ކައުންސިލުން ނިންމީ ހަމައެކަނި ގަބުރުސްތާނުތަކަށް ސަމާލުކަން ދިނުމުގެ ބަދަލުގައި، މާލޭގެ އެކި ސަރަހައްދުތަކުގައި ހުރި ހުސްބިންތައް ދެނެގަނެ، އެ ތަންތަނުގައި ދިވެހި ބޭސްވެރިކަމަށް ބޭނުންވާ ގަސްތައް އިންދުމުގެ މަޝްރޫއު ކުރިއަށް ގެންދިއުމަށެވެ.
