ޢީދުގެ އެކިއެކި ކުޅިވަރުތައް ކުޅެ އުފާފާޅު ކުރާއިރު، އިސްލާމީ ރިވެތި އުސޫލުތަކުގައި ހިފަހައްޓަވައި، ދިވެހީންގެ ރީތި އާދަކާދަތަކާ ބީރައްޓެހި ކަންކަމުން ދުރުވެވަޑައިގަތުމަށް ރައީސް ޑރ. މުހައްމަދު މުއިއްޒު އިލްތިމާސްކުރައްވައިފިއެވެ.
ރައީސް މިހެން ވިދާޅުވީ ބޮޑު އީދުގެ މުނާސަބަތުގައި ފޮނުއްވި ތަހުނިޔާގެ ހިތާބުގަ އެވެ.
ރައީސުލްޖުމްހޫރިއްޔާގެ ޚިޠާބުގައި ފާހަގަކުރެއްވި ގޮތުގައި، އަޟްޙާ ޢީދަކީ މުޅި އިސްލާމީ އުންމަތް އެއްގަލަކަށް އަރުވައި، އެއް ސަފަކަށް ތަރުތީބުކޮށްދޭ އޯގާތެރިކަމުގެ މަތިވެރި ނަމޫނާއެކެވެ. މާތްވެގެންވާ ޢަރަފާތް ބިމުން ފެށިގެން މުޅި އިސްލާމީ ދުނިޔެއަށް ފެތުރިގެންދާ މި އުފާވެރިކަމަކީ، އިންސާނީ ކުލުނާއި ހަމަހަމަކަމުގެ އެންމެ އަލިގަދަ އެއް ރަމްޒުކަމުގައި އެމަނިކުފާނު ވިދާޅުވިއެވެ.
އެގޮތުން، އުޟްޙިޔާ ކަތިލުމާއި، ހަދިޔާ ބަދަލުކުރުމުގެ މަތިވެރި ސުންނަތް އަދާކުރުމުގެ އިތުރުން، ތަނަވަސްކަމުގެ އަހުލުވެރިން ފަގީރުންނާއި ނިކަމެތިންނަށް އެހީތެރިކަން ފޯރުކޮށްދިނުމަކީ މުޖުތަމަޢުގެ އިޖުތިމާޢީ ގުޅުން ބަދަހިވެ، އެކުވެރިކަން އާލާވާނޭ ކަންކަންކަމުގައި ރައީސް ފާހަގަކުރެއްވިއެވެ. އަދި މިއީ މާފުކުރުމާއި ހިތްހެޔޮކަމުގެ ޒަރީޢާއިން ހިތްތަކަށް އާ ދިރުމެއް ގެނެސްދޭ މޫސުމެއްކަމުގައިވެސް އެމަނިކުފާނު ވިދާޅުވިއެވެ.
މީގެއިތުރުން، ޤައުމުގެ މުސްތަޤުބަލު ކަމުގައިވާ ޒުވާން ޖީލަށް ރިވެތި އަޚްލާޤީ ސިފަތައް އުނގަންނައިދީ، މުޖުތަމަޢުގެ އެކަނިވެރިންނާއި ނިކަމެތިންގެ ހިނިތުންވުމަކީ ތިމާގެވެސް އުފަލެއް ކަމުގައި ދެކުމަށް މި މަތިވެރި ޢީދުން އިރުޝާދުދޭކަން ރައީސް ހަނދާންކޮށްދެއްވިއެވެ.
