އީދު ނަމާދާ ގުޅިގެން އެމްޓީސީސީގެ ބަސް ދަތުރުތަކުގެ ތާވަލަށް ބަދަލުތަކެއް ގެނެސްފައިވާކަން އެ ކުންފުނިން އާންމުކޮށްފި އެވެ.
އެމްޓީސީސީން މަޢުލޫމާތު ދެއްވި ގޮތުގައި، ޢީދު ދުވަހު ގްރޭޓަރ މާލެ ސަރަހައްދުގައި އާރްޓީއެލް ބަހުގެ ޚިދުމަތް އާންމުކޮށް ފެށުމަށް ހަމަޖެހިފައިވަނީ ހެނދުނު 8:00 ގައެވެ.
ނަމަވެސް، އެއަރޕޯޓަށް ދަތުރުކުރާ ފަރާތްތަކަށް ލުއިފަސޭހަކޮށްދިނުމުގެ ގޮތުން މާލެ، ހުޅުމާލެ ފޭސް 1 އަދި ފޭސް 2 އިން އެއަރޕޯޓަށް ހާއްޞަ ދަތުރުތަކެއް ކުރުމަށް ވަނީ ނިންމާފައެވެ.
މިގޮތުން، އީދު ނަމާދުގެ ކުރިން ކުރިއަށްދާ ފުރަތަމަ ދަތުރުތައް ހެނދުނު 5:30 އިން 6:05 އަށް، އަދި ދެވަނަ ދަތުރުތައް 6:00 އިން 6:35 އަށް ބޭއްވުމަށް ވަނީ ތާވަލުކޮށްފައެވެ.
މި ދަތުރުތަކަށްފަހު، މި ތިން ރޫޓުގެ ޚިދުމަތް ޢީދު ނަމާދަށް މެދުކަނޑާލުމަށްފަހު އަލުން ފަށާނީ ހެނދުނު 8:00 ގައެވެ.
މީގެ އިތުރުން، މާލެއާއި ވިލިމާލެއާ ދެމެދު ކުރާ ފެރީގެ ޚިދުމަތްތަކަށްވެސް ވަނީ ބަދަލުތަކެއް ގެނެސްފައެވެ. އެގޮތުން ހެނދުނު 6:30 އިން 8:15 އަށް ފެރީގެ ޚިދުމަތް މެދުކަނޑާލެވޭނެއެވެ.
އީދު ނަމާދުގެ ކުރިން އެންމެ ފަހު ފެރީ 6:30 ގައި ފުރުމަށް ހަމަޖެހިފައިވާއިރު، ނަމާދަށްފަހު ޚިދުމަތް އަލުން ފަށާނީ ހެނދުނު 8:15 ގައެވެ.
