އދ. މަހިބަދޫ ކައުންސިލްގެ ނައިބު ރައީސް ހޮވުމަށް ބޭއްވި ފޯރިގަދަ އިންތިޚާބު، އަށް ވަނަ ބުރަކަށް ދިއުމަށްފަހު އެމްޑީޕީގެ ކެންޑިޑޭޓް ޒައީމާ މުހައްމަދު ކާމިޔާބު ކުރައްވައިފިއެވެ.
މަހިބަދޫ ކައުންސިލަށް އިންތިޚާބުވި ފަސް މެންބަރުން މަގާމުގެ ހުވާކުރެއްވީ ނިމިދިޔަ އާދިއްތަ ދުވަހުއެވެ. ގާނޫނީ އުސޫލުތައް ބަޔާންކުރާ ގޮތުން، ކައުންސިލަރުން ހުވާކުރުމަށްފަހު ބާއްވާ ފުރަތަމަ ރަސްމީ ޖަލްސާގައި ކައުންސިލްގެ ނައިބު ރައީސް އިންތިޚާބު ކުރަންޖެހެއެވެ. ނައިބު ރައީސްގެ މަގާމަށް ތިން ބޭފުޅަކު ވާދަކުރެއްވިއެވެ. އެއީ އެމްޑީޕީގެ ފަރާތުން ޒައީމާ މުހައްމަދާއި، ޕީއެންސީގެ ފަރާތުން މުހައްމަދު މައުމޫންގެ އިތުރުން، އަމިއްލަ ގޮތުން ވާދަކުރެއްވި ބުންޔާމީން ހަސަނެވެ.
ވޯޓުލުމުގެ ފުރަތަމަ ބުރުގައި ޒައީމާ އާއި މައުމޫނަށް ލިބިވަޑައިގަތީ ކޮންމެ ބޭފުޅަކަށް ދެ ވޯޓެވެ. ބުންޔާމީނަށް ލިބިވަޑައިގަތީ އެއް ވޯޓެވެ. އޭގެ ފަހުން ބޭއްވުނު ކޮންމެ ބުރެއްގައި ވެސް ޒައީމާ އާއި މައުމޫންގެ ވޯޓު 2-2 އިން އެއްވަރުވަމުން ދިޔައިރު، ކޮންމެ ފަހަރަކު ވެސް ބާތިލު އެއް ވޯޓު ހިމެނުނެވެ. މި މަގާމަށް ބޭފުޅަކު އިންތިޚާބު ކުރުމަށްޓަކައި ފުރަތަމަ ދުވަހު އެކަނިވެސް ހަ ޖަލްސާ ބޭއްވި ނަމަވެސް، ވޯޓު އެއްވަރުވުމުގެ ސަބަބުން ކައުންސިލްގެ ރަސްމީ މަސައްކަތްތައް ފެށޭގޮތް ވަނީ ނުވެފައެވެ.
މި މައްސަލައަށް ހައްލެއް ހޯދުމަށް ހޯމަ ދުވަހުގެ މެންދުރު ބޭއްވި ޖަލްސާ ވެސް ނިމުނީ ނަތީޖާއެއް ނުނެރެވިއެވެ. ނަމަވެސް، ހޯމަ ދުވަހުގެ ރޭ 9:00 ގައި ބޭއްވި މި އިންތިޚާބުގެ އަށްވަނަ ޖަލްސާގައި ޒައީމާ މުހައްމަދު ވަނީ ތިން ވޯޓު ކާމިޔާބު ކުރައްވައި، ނައިބު ރައީސްގެ މަގާމު ކަށަވަރު ކުރައްވާފައެވެ. އޭނާއާ ވާދަކުރެއްވި ޕީއެންސީގެ ކެންޑިޑޭޓް މައުމޫނަށް އެ ބުރުގައި ލިބިވަޑައިގަތީ ދެ ވޯޓެވެ.
