ޢިމާރާތްކުރުމުގެ ދާއިރާގައި އަމަލުކުރަންޖެހޭ ޤާނޫނުތަކާއި ގަވާއިދުތަކަށް ސަރުކާރުގެ ވުޒާރާތަކާއި ކުންފުނިތަކުގެ މުވައްޒަފުން އަހުލުވެރިކުރުވުމުގެ މަގުސަދުގައި މިނިސްޓްރީ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓުން ޚާއްޞަ ޕްރޮގްރާމެއް ފަށައިފިއެވެ.
މި މަހުގެ 18 އިން 19 އަށް ކުރިއަށްގެންދާ މި ޕްރޮގްރާމަކީ ޢިމާރާތްކުރުމުގެ ޤާނޫނު ގެ ދަށުން އެކުލަވާލެވިފައިވާ ގަވާއިދުތަކަށް ދައުލަތުގެ މުއައްސަސާތަކާއި ސަރުކާރު ހިއްސާވާ ކުންފުނިތަކުގައި މަސައްކަތްކުރާ މުވައްޒަފުން އަހުލުވެރިކުރުވުމަށް ހިންގާ ޕްރޮގްރާމެކެވެ. މިއީ ޢިމާރާތްކުރުމުގެ ދާއިރާގައި ހަރަކާތްތެރިވާ ފަރާތްތަކާއި އާންމުން ހޭލުންތެރިކުރުވުމަށް އެ ވުޒާރާއިން ކުރިއަށްގެންދާ ސިލްސިލާ ހަރަކާތްތަކުގެ ބައެކެވެ.
ހައުސިންގ މިނިސްޓްރީން މަޢުލޫމާތު ދެއްވާގޮތުގައި، މި ޕްރޮގްރާމްގެ ސެޝަންތަކުގައި ޢިމާރާތްކުރުމުގެ ދާއިރާއާ ގުޅުންހުރި މުހިންމު ބައިތަކަކަށް އަލިއަޅުވާލެވޭނެއެވެ. އޭގެ ތެރޭގައި:
- ޢިމާރާތްކުރުމުގެ ހުއްދަތައް ނެގުމާއި ކުރެހުން ފާސްކުރުން.
- ޕްރޮޖެކްޓްތަކަށް ލައިސަންސް ދިނުމުގެ އުސޫލުތައް.
- ޢިމާރާތްކުރުމަށް ބޭނުންކުރާ ތަކެތި އެތެރެކުރުމާއި އުފެއްދުން ކޮންޓްރޯލްކުރުމުގެ ގަވާއިދު.
- ޢިމާރާތްކުރާ ސައިޓުތަކުގެ ސަލާމަތީ ކަންކަން ބެލެހެއްޓުން.
- ކޮންޓްރެކްޓަރުންގެ ޒިންމާތަކާއި، ގަވާއިދާ ޚިލާފުވާ ފަރާތްތަކާމެދު އަމަލުކުރާނެ އުސޫލުތައް.
މި ޕްރޮގްރާމްގެ ސަބަބުން ދައުލަތުގެ މަޝްރޫޢުތައް ހިންގުމުގައި ހަރަކާތްތެރިވާ މުވައްޒަފުންނަށް ޤާނޫނީ އިމުގެ ތެރެއިން މަސައްކަތްތައް ކުރިއަށް ގެންދިއުމަށް ބޮޑެތި ފަސޭހަތަކެއް ލިބިގެންދާނެ ކަމަށް ހައުސިންގ މިނިސްޓްރީން ބުނެއެވެ.
