'އަދަދު' ނޫހުގެ ނޫސްވެރިން ކަމަށްވާ ލީވާން އަލީ ނަސީރާއި މުހައްމަދު ޝަހުޒާން ހައްޔަރުކޮށް، ޖަލަށްލުމަށް ކްރިމިނަލް ކޯޓުން ނިންމި ނިންމުން ބައިނަލްއަގުވާމީ ނޫސްވެރިންގެ ޖަމިއްޔާތަކުން ހަރުކަށި އިބާރާތުން ކުށްވެރިކޮށްފިއެވެ.
މިކަމާ ގުޅިގެން އިންޓަނޭޝަނަލް ފެޑްރޭޝަން އޮފް ޖާނަލިސްޓްސް (އައިއެފްޖޭ) އާއި ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ވަނީ އެ ދެ ނޫސްވެރިން ވަގުތުން މިނިވަންކުރުމަށް ގޮވާލާފައެވެ.
'އަދަދު' ނޫހުގައި ޝާއިއުކުރި ޚަބަރަކާ ގުޅިގެން ލީވާން އަލީ ނާސިރު 10 ދުވަހަށް ޖަލަށްލުމަށް ހުކުމްކޮށްފައިވާއިރު، ރައީސުލްޖުމްހޫރިއްޔާއާ ސުވާލުކުރި ނޫސްވެރިޔާ މުހައްމަދު ޝަހުޒާން ވަނީ 15 ދުވަހަށް ޖަލަށްލާފައެވެ.
ލީވާން ކޯޓަށް ހާޒިރުކުރީ ކޯޓު އަމުރަކާ ގުޅޭގޮތުން ލިޔުނު ރިޕޯޓަކާ ގުޅިގެން ކަމަށް މައުލޫމާތު ލިބެއެވެ. އަދި ޝަހުޒާން ހާޒިރުކުރީ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، ކޯޓު އަމުރަކާ ޚިލާފަށް ރައީސް ޑރ. މުހައްމަދު މުއިއްޒާ ސުވާލުކުރި ކަމަށް ބުނާ މައްސަލައެއްގައެވެ.
މި މައްސަލައިގައި ކަންބޮޑުވުން ފާޅުކުރަމުން ސީޕީޖޭ އިން ބުނީ، ދެ ނޫސްވެރިން ވަގުތުން މިނިވަންކުރަންޖެހޭ ކަމަށާއި، ޝަރުއީ ނިޒާމުގެ ތެރެއިން ނޫސްވެރިންނަށް އަމާޒުކޮށް ހިންގާ މިފަދަ އަމަލުތައް ވަގުތުން ހުއްޓާލަންޖެހޭ ކަމަށެވެ. ހަމައެއާއެކު، އައިއެފްޖޭއިން ވެސް ވަނީ ނޫސްވެރިން ޖަލަށްލީ މައްސަލަ އެންމެ ފަރުދީ ފެންވަރުގައި ކުށްވެރިކޮށްފައެވެ.
