ރާއްޖޭގައި ޖުމުލަ3900 އަށްވުރެ ގިނަ ނަރުހުން އެބަތިބިކަމަށާއި ގިނައީ ދިވެހި ނަރުހުންކަމަށް ހެލްތު މިނިސްޓްރީގެ ތަފާސްހިސާބުތަކުން ދައްކައިފިއެވެ.
މިއަދު އެ ވުޒާރާއިން އާއްމުކުރި ތަފާސހިސާބުތަކަށް ބަލާއިރު ރާއްޖޭގެ އެކި ކަންކޮޅުތަކުގައި ހުރި ސިއްހީ ހިދުމަތް ދޭ މަރުކަޒުތަކުގައި ޖުމްލަ 3،907 ނަރުހުން އަންނަނީ މަސައްކަތްކުރަމުންނެވެ. ރާއްޖޭގައި މަސައްކަތްކުރާ ނަރުހުންގެ ތެރެއިން 3،593 މީހުންނަކީ އަންހެނުންނެވެ. އެއީ ނަރުހުންގެ ޖުމްލަ 92 އިންސައްތައެވެ. ފިރިހެން ނަރުހުންގެ އަދަދަކީ 314 އެވެ. އެއީ ނަރުހުންގެ އެންމެ އަށް އިންސައްތައެވެ.
މާލެއާއި ރާއްޖެތެރެއަށް ބަލާއިރު ގިނަ ނަރުހުން މަސައްކަތްކުރަނީ މާލޭގައެވެ. އެގޮތުން 1،989 ނަރުހަކު މާލޭގައި މަސައްކަތްކުރާއިރު އަތޮޅު ތެރޭގައި 1،918 ނަރުހުން މަސައްކަތްކުރެއެވެ. މި ހިސާބުތަކަށް ބަލާއިރު މާލޭ ސަރަހައްދުގައި ނަރުހުންގެ 51 އިންސައްތަ މީހުން މަސައްކަތްކުރާއިރު، އަތޮޅުތަކުގައި މަސައްކަތްކުރަނީ 49 އިންސައްތަ ނަރުހުންނެވެ.
އަދި ތަފާސްހިސާބުތަކުން ދައްކާ ގޮތުގައި ރާއްޖޭގައި މަސައްކަތްކުރާ ނަރުހުންގެ ތެރެއިން 2،503 ނަރުހުންނަކީ ދިވެހިންނެވެ. މިވަގުތު ރާއްޖޭގައި މަސައްކަތްކުރާ ބިދޭސީ ނަރުހުންގެ އަދަދަކީ 1،404 އެވެ. މާނައަކީ ނަރުހުންގެ ގާތްގަނޑަކަށް ތިންބައިކުޅަ ދެބައި ނުވަތަ 64 އިންސައްތަ މީހުންނަކީ ދިވެހިންނެވެ.
Celebrating #InternationalNursesDay 2026!
Honouring the 3,907 nurses serving across the Maldives with compassion and dedication. From the atolls to the Greater Malé area, your commitment strengthens our healthcare system every day. #NursesDay2026 #HealthMaldives… pic.twitter.com/pcerPLvsxZ— Ministry of Health, Family and Welfare (@MoHmv) May 12, 2026
ރާއްޖޭގައި ކުރީގައި ނަރުހުންގެ ގޮތުގައި މަސައްކަތްކުރަމުންއައީ ގިނައިން ބިދޭސީންނެވެ. ނަަމަވެސް ނަރުހުން ތަމްރީނުކުރުމުގެ މަސައްކަތް ފުޅާކުރެވުމުގެ ނަތީޖާއެއްގެ ގޮތުން ހިދުމަތަށް ކޮންމެ އަހަރަކު ނުކުންނަ ދިވެހި ނަރުހުންގެ އަދަދު އަންނަނީ ވަރަށް ބޮޑަށް އިތުރުވަމުންނެވެ. ގައުމީ ޔުނިވަސިޓީގެ އިތުރަށް ވިލާ ކޮލެޖުގައިވެސް މިހާރު ނަރުސްކަން ކިޔަވއިދެއެވެ.
ނަރުހުން މަސައްކަތްކުރާ ތަންތަނަށް ބަލާއިރު 3،291 ނަރުހުންނަކީ ސަރުކާރުން ހިންގާ ސިއްހީ ހިދުމަތްދޭ ތަންތަނުގައި މަސައްކަތްކުރާ މީހުންނެވެ. އެއީ ނަރުހުންގެ 84 އިންސައްތަ މީހުންނެވެ. އަމިއްލަ ފަރާތްތަކުން ހިންގާ ސިއްހީ ހިދުމަތްދޭ މަރުކަޒުތަކުގައި 616 ނަރުހުން މަސައްކަތްކުރެއެވެ. އެއީ ނަރުހުންގެ 16 އިންސައްތައެވެ.
