ސްރީ ލަންކާގެ ރައީސް އަނޫރާ ކުމާރާ ޑިސަނަޔަކެގެ ދައުވަތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަންނަ އާދިއްތަ ދުވަހު އެ ގައުމަށް ކުރައްވާ ރަސްމީ ދަތުރުފުޅުގައި، ލަންކާގައި އުޅޭ ދިވެހިންނަށް ވިސާ ހޯދުމުގައި ކުރިމަތިވާ އުނދަގޫތަކަށް ލުޔެއް ހޯދުމާ ގުޅޭގޮތުން ވާހަކަދައްކަވާނެ ކަމަށް ސަރުކާރުގެ ތަރުޖަމާނު މުހައްމަދު ހުސެން ޝަރީފް (މުންދު) މިއަދު ހާމަކުރައްވައިފިއެވެ.
ރައީސްގެ މި ދަތުރުފުޅު ކުރިއަށްދާނީ އަންނަ އާދިއްތަ ދުވަހުން ފެށިގެން ބުދަ ދުވަހުގެ ނިޔަލަށެވެ.
ޕީއެސްއެމްގެ "ޕްރެސާ ވިތު ދަ ސްޕޯކްސް" ޕްރޮގްރާމްގައި ވާހަކަދައްކަވަމުން މުންދު ވިދާޅުވީ، މި ދަތުރުފުޅުގެ ތެރެއިން ދެ ގައުމުގެ އިސްވެރިންގެ މެދުގައި ރަސްމީ ބައްދަލުވުންތަކެއް ބޭއްވުމަށް ހަމަޖެހިފައިވާ ކަމަށެވެ. ލަންކާގެ ވިސާގެ ގަވާއިދުތަކަށް ބަދަލު އައީ 2019 ވަނަ އަހަރުގެ އޭޕްރީލް 21 ގައި ދިން "އީސްޓަ ސަންޑޭ" ޓެރަރިސްޓް ހަމަލާތަކާ ގުޅިގެންކަން އޭނާ ފާހަގަކުރެއްވިއެވެ.
އެ ހަމަލާއަށްފަހު ލަންކާގެ އިދާރާތަކުން ގެނައި ބަދަލުތަކުގެ ސަބަބުން، ދިވެހިން ރެސިޑެންސް ވިސާ އާކުރުމަށް ބޭނުންވާ ލިޔެކިޔުންތަކާއި އޭގެ މުއްދަތުތަކަށް ބޮޑެތި ބަދަލުތަކެއް އައިސްފައިވާ ކަމަށް މުންދު ވިދާޅުވިއެވެ. މިގޮތުން ވިސާ އާކުރާ ކޮންމެ ފަހަރަކު 200 ޑޮލަރު ދައްކަންޖެހުމާއި، 75 ޑޮލަރުގެ މެޑިކަލް ރިޕޯޓެއް ހުށަހެޅުމުގެ އިތުރުން މީހަކަށް 1،000 ޑޮލަރުގެ ޑިޕޮސިޓެއް ބަހައްޓަން ޖެހުމަކީ ދިވެހިންނަށް އޮތް ބޮޑު ތަކުލީފެއްގެ ގޮތުގައި އޭނާ ސިފަކުރެއްވިއެވެ.
މީގެ އިތުރުން، މި ދަތުރުފުޅުގައި ދެ ގައުމުގެ ވިޔަފާރިވެރިން ގުޅުވައިދިނުމާއި، އިންވެސްޓްމަންޓްގެ ފުރުސަތުތަކާ ބެހޭގޮތުން މަޝްވަރާކުރުމަށް ވެސް ވަނީ ރޭވިފައެވެ. ރައީސް މުއިއްޒު ލަންކާގެ ބޮޑުވަޒީރާއި ވަޒީރުންގެ އިތުރުން، އެ ގައުމުގައި ދިރިއުޅޭ ދިވެހި ރައްޔިތުންނާ ވެސް ބައްދަލުކުރައްވާނެއެވެ. ފާހަގަކޮށްލެވޭ ގޮތުގައި، ރާއްޖެއާއި ލަންކާގެ ސިޔާސީ ގުޅުމަށް 60 އަހަރު ފުރުމުގެ މުނާސަބަތުގައި މިދިޔަ އަހަރު ލަންކާގެ ރައީސް ވެސް ވަނީ ރާއްޖެއަށް ޒިޔާރަތް ކުރައްވާފައެވެ.
