ކަސްޓަމްސްގެ ހިސާބުތަކަށް ބަލާއިރު، ފެބުރުވަރީ މަހު އެކްސްޕޯޓްކުރި 51 މިލިޔަން ރުފިޔާގެ މަހާ އަޅާބަލާއިރު، މާރިޗު މަހު މި އަދަދު ވަނީ 69 މިލިޔަން ރުފިޔާއަށް އަރާފައެވެ. މިއީ ގާތްގަނޑަކަށް %35 ގެ ކުރިއެރުމެކެވެ.
ރާއްޖެއިން އެންމެ ގިނައިން ބޭރުކުރާ ކަޅުބިލަމަހާއި ކަންނެލީގެ ބާވަތްތަކުގެ ތެރެއިން، ވަކިން ހާއްސަކޮށް ދަޅުގައި ބަންދުކުރި މަސް އެކްސްޕޯޓްކުރި މިންވަރު ވަނީ %75 އިތުރުވެފައެވެ. އެގޮތުން ފެބުރުވަރީ މަހު 29 މިލިޔަން ރުފިޔާގައި ހުރި ދަޅުމަހުގެ އެކްސްޕޯޓް، މާރިޗު މަހު ވަނީ 51 މިލިޔަން ރުފިޔާއަށް އުފުލިފައެވެ.
މާރިޗު މަހުގެ އެކްސްޕޯޓްގެ ތަފްސީލަށް ބަލާއިރު، ދަޅުމަހުގެ ގޮތުގައި 51 މިލިޔަން ރުފިޔާ، ގަނޑުކުރި ކަޅުބިލަމަހުގެ ގޮތުގައި 8 މިލިޔަން ރުފިޔާ އަދި ތާޒާ ކަންނެލީގެ ގޮތުގައި 6 މިލިޔަން ރުފިޔާގެ މުދާ ބޭރުކޮށްފައިވެއެވެ.
ރާއްޖޭގެ އިޤްތިޞާދުގައި މަސްވެރިކަމުގެ ހިއްސާ ބޮޑުކުރުމަށްޓަކައި، މަސް ރައްކާކުރުމާއި ޕްރޮސެސްކުރުމުގެ ޤާބިލުކަން އިތުރުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. މިގޮތުން ކުރިއަށް އޮތް ތިން އަހަރުގެ ތެރޭގައި މަސް ޕްރޮސެސްކުރާ މިންވަރު ނުވަ ގުނައަށް އިތުރުކުރުމަކީ ސަރުކާރުގެ މުހިންމު އަމާޒެއްކަމަށް ފިޝަރީޒް މިނިސްޓްރީން ހާމަކުރައްވައެވެ.
