ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) ގެ ދަނާލުގައި އުޅުނު 18 އަހަރުގެ ދަރިވަރަކު އަމިއްލައަށް މަރުވި ހާދިސާއާ ގުޅިގެން، އެތަނުގެ އިސްވެރިޔާ އަހުމަދު ޝަފީގު (ސައްޕެ) ރޭގެ ވަގުތެއްގައި ސަސްޕެންޑްކޮށްފިއެވެ.
ޝަފީގު ސަސްޕެންޑްކުރީ، މަރުވި ދަރިވަރަކީ ނަފްސާނީ ބައްޔަށް ފަރުވާ ހޯދަމުންދިޔަ ކުއްޖެއްކަން އެނގިހުރެ، އެ މައުލޫމާތު ޔުނިވާސިޓީގެ މެނޭޖްމަންޓާ ހިއްސާނުކޮށް ސިއްރުކުރި ކަމަށް ތުހުމަތު ކުރެވޭތީއެވެ.
އިހުމާލުގެ ބޮޑު ތުހުމަތެއް
މައުލޫމާތު ލިބިފައިވާ ގޮތުގައި، މިދިޔަ މަހުވެސް އެ ދަރިވަރު އަމިއްލަ ނަފުސަށް ގެއްލުންދޭން އުޅުމުން ކުއްލި ހާލަތުގައި ހޮސްޕިޓަލަށް ގެންގޮސް ފަރުވާ ދީފައިވެއެވެ.
-
ރިޕޯޓް ނުކުރުން: ހޮސްޕިޓަލުން ދޫކޮށްލުމުން ދަނާލުގެ ވެރިޔާއާ އެކުއްޖާ ހަވާލުކުރި ނަމަވެސް، އެ ހާދިސާގެ އެއްވެސް މައުލޫމާތެއް އޭނާ އެމްއެންޔޫގެ ވެރިންނަކަށް ނާަންގައެވެ.
-
އެހީތެރިކަން ނުހޯދުން: ކުއްޖާގެ ހާލަތު އެނގިހުރެ، ޔުނިވާސިޓީގެ "ސްޓޫޑެންޓް ސަޕޯޓް" ސިސްޓަމްގެ އެހީތެރިކަން ހޯދަންވެސް ޝަފީގު މަސައްކަތް ކޮށްފައި ނުވާކަން ވަނީ ހާމަވެފައެވެ.
ތައުލީމީ ދާއިރާގެ އިސް ބޭފުޅަކު ވިދާޅުވި ގޮތުގައި، މިދިޔަ މަހު އެކަން އެމްއެންޔޫއަށް އެނގުނު ނަމަ، އެ ކުއްޖާގެ ފުރާނަ ސަލާމަތްކުރަން ފިޔަވަޅު އެޅުމުގެ ފުރުސަތު އޮތެވެ.
ފުލުހުންގެ ޓައިމްލައިން
ހޯމް މިނިސްޓަރު އަލީ އިހުސާން މިއަދު ބޭއްވި ޕްރެސް ކޮންފަރެންސްގައި ވިދާޅުވީ، އެ ކުއްޖާ މަރުވުމުގެ ކުރިން ފުލުހުންގެ ވިކްޓިމް ސަޕޯޓް ޔުނިޓަށް ހަތް ފަހަރު މެސެޖު ކުރި ކަމަށެވެ.
-
ލަސްވުން: ފުލުހުން ދަނާލަށް ގޮސް އެ ކުއްޖާ އުޅޭ ކޮޓަރި ހޯދުމަށްވެސް 20 އަކަށް މިނެޓް ހޭދަވިއެވެ.
-
މުއާމަލާތް: ފުރަތަމަ މެސެޖުން ފެށިގެން ފުލުހުންނަށް ކޮޓަރިއަށް ވަދެވުނުއިރު 6 ގަޑިއިރު ވަނީ ހޭދަވެފައެވެ.
މަރުގެ ސަބަބު
ކިޔެވުމަށް މޮޅު ކަމަށް ފާހަގަކުރެވޭ އެ ދަރިވަރު އަމިއްލައަށް މަރުވީ އާއިލީ މައްސަލަތަކެއްގެ ސަބަބުން ކަމަށް މިހާތަނަށް އެނގިފައިވެއެވެ. އަދި ބައެއް ފަރާތްތަކުން ބުލީގެ ތުހުމަތު ކުރި ނަމަވެސް، އެފަދަ އެއްވެސް މައްސަލައެއް އެމްއެންޔޫގައި ރެކޯޑު ކުރެވިފައި ނެތް ކަމަށް އޮފިޝަލުން ވިދާޅުވިއެވެ.
މި ހާދިސާއާ ގުޅިގެން ކަމާބެހޭ އިދާރާތަކުން ދަނީ އިތުރަށް ތަހުގީގު ކުރަމުންނެވެ.
