ބޮޑުތަކުރުފާނު މަގު ތަރައްގީކޮށް ފުޅާކުރުމުގެ މަޝްރޫއުގެ ދަށުން، ޕޭވްމަންޓް ހެދުމަށް ހުރަސްއެޅޭ ގޮތަށް ހުރި ލޯކަލް މާރުކޭޓުގެ ގޮޅިތައް ވަގުތީ މާރުކޭޓަކަށް ބަދަލުކުރުމުގެ މަސައްކަތް މާލޭ ސިޓީ ކައުންސިލުން ފަށައިފިއެވެ.
މޭޔަރު އާދަމް އާޒިމް ވިދާޅުވި ގޮތުގައި، މަގާ އިންވެގެން ހުރި ލޯކަލް މާރުކޭޓު ސަރަހައްދުން ޖުމްލަ 55 ގޮޅިއެއް ހުސްކުރަން ޖެހެއެވެ. މި ގޮޅިތައް ބަދަލުކުރުމަށް ހަމަޖެހިފައިވަނީ އެމްއެމްއޭ އިމާރާތުގެ ފުރަގަހަށާއި ހައި ކޯޓު ކުރިމަތީގައި އޮންނަ ޕާކިން ޒޯންގައި ގާއިމްކޮށްފައިވާ ވަގުތީ މާރުކޭޓުތަކަށެވެ.
މާރުކޭޓު ސަރަހައްދު ހުސްކުރުން
ޕޭވްމަންޓްގެ މަސައްކަތް ނުނިމި ލަސްވީ މާރުކޭޓު ހުސްނުކުރެވި އޮތުމުން ކަމަށް ހައުސިން މިނިސްޓްރީން ކުރިން ބުނެފައިވެއެވެ. ލޯކަލް މާރުކޭޓުގެ ގޮޅިތަކުގެ އިތުރުން، އެ ސަރަހައްދުގައި ހުރި ވަޅޯމަސް މާރުކޭޓުގެ 100 އެއްހާ ގޮޅި ވެސް ބަދަލުކުރާނެ ތަނެއް ހަމަޖެހުނުހާ އަވަހަކަށް އެތަން ހުސްކުރުމުގެ މަސައްކަތް ކުރިއަށްދާނެއެވެ.
ޒަމާނީ އާ މާރުކޭޓު މަޝްރޫއު
މިހާރު ހުރި މާރުކޭޓުތައް ވަގުތީ ތަންތަނަށް ބަދަލުކުރަނީ ހަމައެކަނި މަގު ހެދުމަކަށް ނޫނެވެ. އެ ސަރަހައްދުގައި 127 މިލިއަން ރުފިޔާގެ ބޮޑު މަޝްރޫއެއްގެ ދަށުން 6 ފަންގިފިލާގެ "ވެޓް މާކެޓް ކޮމްޕްލެކްސް" އެއް އެޅުމަށް ވަނީ ނިންމާފައެވެ.
-
ބޭސްމަންޓް: ޕާކިންއަށް ހާއްސަ.
-
ގްރައުންޑް ފްލޯ: މަސް މާރުކޭޓު.
-
1 ވަނަ ފްލޯ އިން 3 ވަނަ ފްލޯއަށް: ތަރުކާރީ މާރުކޭޓު.
-
4 ވަނަ ފްލޯ: ފުޑް ކޯޓު.
ޖަޕާނު ސަރުކާރުގެ އެހީގައި ކުރިއަށްގެންދާ މި މަޝްރޫއުގެ މަސައްކަތް އަމިއްލަ ކުންފުންޏަކާ މިދިޔަ މާޗު މަހު ވަނީ ހަވާލުކޮށްފައެވެ.
މަގު ހެދުމުގެ މަސައްކަތް
ބޮޑުތަކުރުފާނު މަގުގެ ނޯތު ހާބަރުން ފެށިގެން ރަސްމީ ފާލަމާ ހަމައަށް މިހާރު ވަނީ ތާރު އަޅައި ނިންމާފައެވެ. މިހާރު މަސައްކަތް ކުރިއަށްދަނީ ރަސްމީ ފާލަމުން ފެށިގެން ހެންވޭރު ޓާމިނަލާ ހަމައަށެވެ. މި މަސައްކަތް ނިމުމުން ބާޒާރުމަތީގެ ދަތުރުފަތުރަށް ބޮޑު ލުޔެއް ލިބިގެންދާނެއެވެ.
