ވިލިމާލޭގެ ފުނަވަލު ސަރަހައްދުގައި ހުރި ތާރީޚީ ގަސްތައް ކަނޑައި، އެ ބިމުގައި ހައުސިން ޔުނިޓުތަކެއް ބިނާކުރަން ސަރުކާރުން ފަށާފައިވާ މަޝްރޫއު ހުއްޓުވުމަށް އެދި ސުޕްރީމް ކޯޓަށް ދުސްތޫރީ މައްސަލައެއް ހުށަހަޅައިފިއެވެ.
މި މައްސަލަ ކޯޓަށް ހުށަހެޅުއްވީ ތިމާވެށީގެ ހިމާޔަތުގައި މަސައްކަތްކުރައްވާ ހުމައިދާ އަބްދުލްޣަފޫރާއި އަހުމަދު އިކުރާމްއެވެ. މައްސަލަ ހުށަހެޅި ފަރާތްތަކުން ބުނާ ގޮތުގައި، މުހިއްޔުއްދީން ސްކޫލް ކުރިމަތީގައި އޮންނަ މި ބިމަކީ ބިޔަ ފުނަގަސްތަކުން މުއްސަނދިވެފައިވާ، ތިމާވެށީގެ ގޮތުން ނާޒުކު ސަރަހައްދެކެވެ.
ސުޕްރީމް ކޯޓަށް ހުށަހެޅި މައްސަލައިގައި ފާހަގަކޮށްފައިވާ މުހިންމު ނުކުތާތައް:
-
އީއައިއޭ ހަދާފައި ނެތުން: މިފަދަ ބޮޑު މަޝްރޫއެއް ފެށުމުގެ ކުރިން ގާނޫނީ ގޮތުން މަޖުބޫރުކުރާ "އެންވަޔަރަންމަންޓަލް އިމްޕެކްޓް އެސެސްމަންޓް" ރިޕޯޓެއް ތައްޔާރުކޮށްފައި ނުވުން.
-
ގާނޫނާ ހިލާފުވުން: ގާނޫނުއަސާސީން ކަށަވަރުކޮށްދޭ ތިމާވެށި ހިމާޔަތްކުރުމުގެ ހައްގާއި، އިދާރީ އިޖުރާއަތްތަކާ ސަރުކާރުން ހިލާފުވެފައިވާ ކަމަށް ބުނުން.
-
ގަސްތަކުގެ ދަފްތަރު: ހިމާޔަތްކޮށްފައިވާ ގަސްތަކުގެ ދަފްތަރު އަދާހަމަކޮށް، އެ ގަސްތަކަށް ގެއްލުންވާ ފަދަ އެއްވެސް ކަމެއް ނުކުރުމަށް އަމުރަކަށް އެދުން.
ބީއެމްއެލް އެފޯޑަބަލް ހޯމް ލީސިންގެ ދަށުން މާލެ ސަރަހައްދުގައި 3،000 ހައުސިން ޔުނިޓު އެޅުމަށް ނިންމާފައިވާއިރު، ވިލިމާލޭގެ މި ބިން ސާފުކުރުމުގެ މަސައްކަތް މިހާރު ވަނީ ފަށާފައެވެ. މިކަމާ ގުޅިގެން ތިމާވެށި ހިމާޔަތްކުރާ ޖަމިއްޔާތަކާއި އިމާރާތްކުރުމުގެ ދާއިރާގެ ފަންނުވެރިން އަންނަނީ ކަންބޮޑުވުން ފާޅުކުރަމުންނެވެ.
ހައުސިން މިނިސްޓަރު ޑރ. އަބްދުﷲ މުއްތަލިބު މީގެ ކުރިން ވިދާޅުވެފައިވަނީ، މި މަޝްރޫއު ކުރިއަށް ގެންދާނީ ވީހާވެސް މަދު ގަހެއް ކަނޑައިގެން ކަމަށާއި، ކޮންމެހެން ނަގަންޖެހޭ ގަހެއް މެނުވީ ނުނަގާނެ ކަމަށެވެ. ނަމަވެސް، ދައުވާކުރާ ފަރާތްތަކުން އެދިފައިވަނީ ގުދުރަތީ ވަސީލަތްތައް ބޭކާރުނުވާނެ ގޮތަކަށް، ދެމެހެއްޓެނިވި ތަރައްގީގެ އުސޫލުން މަޝްރޫއުތައް ކުރިއަށް ގެންދިއުމަށް ސަރުކާރުގެ މައްޗަށް އަމުރެއް ނެރެދިނުމަށެވެ.
