ހުޅުމާލޭގެ ޗެނަލް ޕާކު ސަރަހައްދާއި ކުޑަގިރި ޑައިވް ރެކުގެ ގުދުރަތީ ރީތިކަން ދަމަހައްޓައި، ކަނޑުގެ ދިރުންތައް އާލާކުރުމުގެ މަގުސަދުގައި މުރަކަ އިންދުމުގެ ބޮޑު ހަރަކާތެއް ހިންގުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފިއެވެ.
މި ހަރަކާތް ބޭއްވުމަށް ތާވަލުކޮށްފައިވަނީ އަންނަ މެއި މަހުގެ 13 ވަނަ ދުވަހުއެވެ. މިއީ މާލެ ސަރަހައްދުގެ ތިމާވެށި ހިމާޔަތްކޮށް، މޫދުގެ ދިރުންތައް އަންނަން އޮތް ޖީލުތަކަށް ފޯރުކޮށްދިނުމަށް އެޗްޑީސީން ކުރިއަށްގެންދާ "ސީއެސްއާރު" މަޝްރޫއެކެވެ.
ޖަމިއްޔާތަކަށް ބައިވެރިވުމުގެ ފުރުސަތު
އެޗްޑީސީން ވަނީ މި މުހިންމު ހަރަކާތުގައި ބައިވެރިވުމުގެ ފުރުސަތު ތިމާވެށީގެ ދާއިރާގައި މަސައްކަތްކުރާ މަދަނީ ޖަމިއްޔާތަކަށް ހުޅުވާލާފައެވެ.
-
ބައިވެރިވާނެ ގޮތް: މިކަމަށް ޝައުގުވެރިވާ ޖަމިއްޔާތަކުން
[email protected]އަށް އީމެއިލް ކުރެއްވުމަށް އެޗްޑީސީން އެދެއެވެ. -
އަމާޒު: ތިމާވެށި ހިމާޔަތްކުރުމުގައި ހަރަކާތްތެރިވާ ފަރާތްތަކާ ގުޅިގެން، މާނަހުރި ބަދަލެއް މޫދުގެ މާހައުލަށް ގެނައުން.
އެޗްޑީސީން ފާހަގަކުރި ގޮތުގައި، ހުޅުމާލޭގެ ފަރުތަކާއި ކުޑަގިރި ފަދަ ސަރަހައްދުތަކަކީ ގިނަ އަދަދެއްގެ މީހުން ޑައިވް ކުރުމަށާއި މޫދު ކުޅިވަރުތަކަށް ބޭނުންކުރާ ތަންތަނަށް ވުމާއެކު، އެ ތަންތަނުގެ ދިރުންތައް ރައްކާތެރިކުރުމަކީ ކޮންމެހެން ބޭނުންތެރި ކަމެކެވެ.
މިފަދަ މަޝްރޫއުތައް ކުރިއަށްގެންދިއުމުގައި ޖަމިއްޔާތަކުން ދޭ އެއްބާރުލުމަށް އެ ކޯޕަރޭޝަނުން ވަނީ ޝުކުރު އަދާކޮށްފައެވެ.
