ފޯރީގައި މުޅި ރާއްޖެ އިންތިހާބުތަކަކަށް ހުއްޓި ވޯޓުލުން ކުރިއަށް ދާއިރު މިއީ މިއަދު ކޮންމެހެން ވެސް ސަމާލުކަން ދޭން ޖެހޭ ކަމެކެވެ. ރާއްޖޭގެ އެކި ހިސާބުތަކަށް މިއަދު އިހުސާސްކުރެވޭ ހޫނުމިން އެވްރެޖުކޮށް 35 ޑިގްރީ ސެލްސިއަސް އަށް ވުރެ މަތީގައި ހުރިއިރު، އެންމެ ހޫނުގަދައީ މާލެ ސަރަހައްދަށް ކަމަށް މޫސުމާ ބެހޭ އިދާރާ (މެޓް އޮފީސް) އިން ހާމަކޮށްފިއެވެ.
މިއަދު ހެނދުނު 11:00 ގެ ރެކޯޑްތަކަށް ބަލާއިރު، މާލެއަށް އިހުސާސްކުރެވޭ ހޫނުމިން ހުރީ 37.3 ޑިގްރީ ސެލްސިއަސް ގައެވެ. މިއީ މިއަދު ކުރިއަށްދާ ލޯކަލް ކައުންސިލް އިންތިހާބުގައި ވޯޓުލާން ނުކުމެ އުޅޭ އާންމުންނަށް ބޮޑު ގޮންޖެހުމަކަށް ވަނީ ވެފައެވެ.
ރާއްޖޭގެ އެހެން ސަރަހައްދުތަކުގެ ހޫނުމިން ހުރި މިންވަރު:
-
ހދ. ހަނިމާދޫ: 36.4 ޑިގްރީ ސެލްސިއަސް
-
ލ. ކައްދޫ: 36.4 ޑިގްރީ ސެލްސިއަސް
-
ގދ. ކާޑެއްދޫ: 35.9 ޑިގްރީ ސެލްސިއަސް
-
އައްޑޫ: 35.6 ޑިގްރީ ސެލްސިއަސް
މިއަދަކީ ގިނަ ވަގުތު ބޭރުގައި އުޅެން ޖެހިދާނެ ދުވަހަކަށް ވުމުން، ހަށިގަނޑުން ފެން މަދުވުމާއި ހީޓް ސްޓްރޯކް ކަހަލަ ނުރައްކާތަކުން ސަލާމަތްވުމަށް ފިޔަވަޅުތައް އެޅުން މުހިންމެވެ. އެގޮތުން ކަރު ނުހިއްކި ނަމަވެސް ގިނައިން ފެން ބުއިމާއި، އަވީގައި އުޅޭއިރު ކުޑަ ނުވަތަ ތޮފި ބޭނުންކުރުމަށް ސިއްހީ މާހިރުން ލަފާދެއެވެ.
އާންމުކޮށް ރާއްޖެއަށް އެންމެ ހޫނުގަދަވަނީ އެޕްރީލް މަހުއެވެ. މި މަސް ނިމި ހުޅަނގު މޫސުން ފެށުމުން ހޫނުމިން މެދު މިންވަރަކަށް ތިރިވާނެ ކަމަށް ލަފާކުރެވެއެވެ.
