އަލިފާނުގެ ހާދިސާގައި މަރުވި ދެ މީހެއްގެ ހަށިގަނޑު ބަންގްލަދޭޝަށް ގެންދަނީ

އދ. ދިގުރަށުގައި ބިދޭސީން އުޅޭ އެކަމަޑޭޝަން އިމާރާތެއްގައި ހިނގި އަލިފާނުގެ ހާދިސާގައި މަރުވި މީހުންގެ ތެރެއިން ދެ މީހެއްގެ ހަށިގަނޑު ބަންގްލަދޭޝަށް ގެންދަން ނިންމައިފިއެވެ.

މިދިޔަ ބުރާސްފަތި ދުވަހުގެ ރޭ ދަންވަރު އަލިފާނުގެ ހާދިސާގައި މަރުވި އެންމެންނަކީވެސް ބަންގްލަދޭޝްގެ މީހުންނެވެ.

ރާއްޖޭގައި ހުންނަ ބަންގްލަދޭޝްގެ ހައިކޮމިޝަނުން ބުނީ އަލިފާނުގެ ހާދިސާގައި މަރުވި ސާދަރު އަލީ އާއި ޝަފީގުލް އިސްލާމުގެ ހަށިގަނޑު މިއަދުގެ ވަގުތެއްގައި ބަންގްލަދޭޝަށް ގެންދާނެކަމަށެވެ.

އައިޖީއެމްއެޗްއިން ބުނީ، ފިހިގެން ފަރުވާ ދެމުން އަންނަނީ 40 އަހަރާއި 21 އަހަރުގެ ދެ ފިރިހެނުންނަށްކަމަށެވެ. އެ ދެމީހުންނަށް އަދިވެސް ފަރުވާ ދެމުން އަންނަނީ ވެންޓިލޭޓަރުގައެވެ.

އެ މީހުންގެ ހާލު ބެލުމަށް، ރާއްޖޭގައި ހުންނަ ބަންގްލަދޭޝްގެ ހައި ކޮމިޝަނަރު، ޑރ. އެމްޑީ ނަޒްމުލް އިސްލާމް އާއި އިތުރު އޮފިޝަލުން ވަނީ އައިޖީއެމްއެޗަށް ވަޑައިގެން އެމީހުންގެ ހާލު އޮޅުންފިލުވައިފައެވެ.

ފުުލުހުން ބުނެފައިވާ ގޮތުގައި އަލިފާނުގެ ހާދިސާއެއް ހިނގައިގެން އުޅޭ ކަމުގެ ރިޕޯޓު ލިބުނީ އެރޭ ދަންވަރު 1:57 ހާއިރު އެވެ. އަދި 1:58 ގައި ފުލުހުން އެ ސަރަހައްދަށް ދިޔައިރު ބަދިގެ ތެރެއިން ވަރަށް ބޮޑަށް އަލިފާނުގެ އަސަރު ފެންނަމުން ދިޔައެވެ. ގޭތެރޭގައި ތާށިވެފައި ތިބި މީހުން ސަލާމަތްކުރަން ޖެހުނީ ފުލުހުންނާއި އާންމުން ގުޅިގެން ގޭގެ ބިތްދޮށު ފާރު ތަޅާލައިގެންނެވެ.