ރަސްފަރި ފަރަށް ލިބިފައިވާ ގެއްލުން ރަނގަޅު ކުރުމަށް އެންވަޔަރަންމަންޓަލް ޕްރޮޓެކްޝަން އެޖެންސީ (އީ.ޕީ.އޭ) އާއި އެޓްމޮސްފިއަރ ހޮޓެލްސް އެންޑް ރިސޯޓްސްގެ ދަށުން ހިންގާ އޮބްލޫ-ސެލެކްޓް ސަންގަލީ (އޯ.އެސް.އެސް) އާ ދެމެދު، އެއްބަސްވުމެއްގައި މިއަދު ސޮއިކޮށްފިއެވެ.
މިކަން ހާމަކޮށް އީޕީއިން ބުނީ، މި އެއްބަސްވުމުގެ ދަށުން ރަސްފަރި ފަރަށް ދިރުން ދިނުމުގެ މަސައްކަތްތައް ފަށާނެކަމަށާއި މި ޕްރޮގްރާމްގެ ސަބަބުން ރާއްޖޭގެ ފަރުތަކަށް ލިބިފައިވާ ގެއްލުންތައް ބަލައި، އެފަރުތައް ހިމާޔަތްކުރުމަށް ކުރިއަށް އޮތްތަނުގައިވެސް އިތުރު މަސައްކަތްތައް ކުރެވިގެންދާނެކަމަށެވެ.
Today a Memorandum of Understanding (MoU) was signed between Environmental Protection Agency (EPA) and Oblu-Select Sangeli (OSS) operated by Atmosphere Hotels & Resorts to support the Rasfari Reef Restoration Program. (1/2) pic.twitter.com/OWJy8xBKYE
— EPA Maldives (@EPAMaldives) July 2, 2025
މިކަމާ ގުޅިގެން މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް އިން ބުނީ މި އެއްބަސްވުމުގެ މައިގަނޑު މަގްސަދަކީ، ދިވެހިރާއްޖޭގެ ކަނޑުތަކުގައިވާ މުހިއްމު ފަރެއް ކަމަށްވާ ރަސްފަރި ފަރަށް ދިރުން ދީ، އެ ފަރަށް ލިބިފައިވާ ގެއްލުންތައް ރަނގަޅުކުރުމަށްޓަކައި ކުރެވޭ މަސައްކަތްތަކަށް އޮބްލޫ-ސެލެކްޓް ސަންގަލީގެ ފަރާތުން ފަންނީ އަދި މާލީ އެހީތެރިކަން ފޯރުކޮށްދިނުން ކަމަށެވެ. އަދި ތިމާވެށީގެ ދިރުން ދަމަހައްޓައި، ދިގު މުއްދަތަށް ރައްކާތެރިކުރުމަށްޓަކައި ރިސޯޓުތަކާއި ސަރުކާރުގެ އިދާރާތައް ގުޅިގެން މިފަދަ މަސައްކަތްތައް ކުރުމަކީ ވަރަށް މުހިއްމު ކަމެއްކަމަށްވެސް އެ މިނިސްޓްރީން ބުނެފައި ވެއެވެ.
އަދި ރާއްޖޭގެ އިގްތިސާދުގެ ބިންގަލަކީ ތިމާވެއްޓާއި ކަނޑުފަޅުތައް ކަމުން، މިފަދަ މަސައްކަތްތައް ކުރުމަކީ ދިވެހި ރާއްޖޭގެ ތިމާވެށި ދިރުވައި، އިގްތިސާދީ ގޮތުން ކުރިއަރައިގެން ދިއުމަށް އެޅޭ މުހިއްމު ފިޔަވަޅެއް ކަމަށް އެންވަޔަރަންމަންޓް މިނިސްޓްރީން ބުނެފައި ވެއެވެ.
