ކިރިބަތީގެ ޕާލިމެންޓުން ވަޑައިގެންނެވި ޚާއްޞަ ވަފުދެއް މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް، ޠާރިޤް އިބްރާހީމްގެ އަރިހަށް އިޚްތިރާމުގެ ޒިޔާރަތެއް ކުރައްވައިފިއެވެ.
މި ޒިޔާރަތުގައި، ދެ ޤައުމުގެ މެދުގައި މޫސުމަށް އަންނަ ބަދަލުތަކާ ކުރިމަތިލުމާއި ފަތުރުވެރިކަމުގެ ދާއިރާގައި އެއްބާރުލުން އިތުރުކޮށް، ގުޅުން ބަދަހިކުރުމާ ބެހޭގޮތުން މަޝްވަރާކުރެވުނެވެ.
އަދި މިއީ ދެ ޤައުމުގެ މެދުގައި އޮތް ގުޅުން އިތުރަށް ހަރުދަނާކުރުމަށް މަގުފަހިވެގެންދާނެ ފުރުޞަތެއްކަމަށާއި، ދިވެހިރާއްޖޭގެ ދެމެހެއްޓެނިވި ފަތުރުވެރިކަމުގެ އިސްނެގުންތަކުން ލިބިފައިވާ ތަޖުރިބާތައް ކިރިބަތީގެ ވަފުދާވަނީ ޙިއްސާކޮށްފައެވެ.
We had the privilege of hosting a distinguished delegation from the Kiribati Parliament today. Discussions were held on fostering collaboration and partnerships in areas of climate resilience and tourism, and sharing of lessons from the Maldives’ sustainable tourism initiatives. pic.twitter.com/hvoOtqfy3I
— Ministry of Tourism and Environment (@MoTmv) May 19, 2025
ދިވެހިރާއްޖެއިން މޫސުމަށް އަންނަ ބަދަލުތަކާ ކުރިމަތިލުމަށް ކުރަމުންދާ މަސައްކަތްތަކަކީ ކިރިބަތީ ފަދަ ޖަޒީރާ ޤައުމުތަކަށް ނަމޫނާއެއް ކަމަށާއި އަދި ދެ ޤައުމުގެ މެދުގައި މި ދާއިރާއިން އިތުރު ތަޖުރިބާ ބަދަލުކުރުމަށް އެދިވަޑައިގަންނަވާ ކަމަށް ކިރިބަތީގެ ވަފުދުގެ އިސް ބޭފުޅުންވަނީ ވިދާޅުވެފައެވެ.
މި މަޝްވަރާތަކުގައި ދެ ޤައުމުގެ މެދުގައި ފަތުރުވެރިކަމުގެ ދާއިރާއިން އިތުރު ފުރުޞަތުތައް ހޯދުމާއި، ތިމާވެށި ރައްކާތެރިކުރުމުގެ މުހިންމުކަމާ ބެހޭގޮތުން ވެސް މަޝްވަރާކުރެވުނެވެ. އަދި ކުރިއަށް އޮތް ތަނުގައި ދެ ޤައުމުގެ މެދުގައި އިތުރު ބައްދަލުވުންތައް ބޭއްވުމަށް އެއްބަސްވެވުނެވެ.
