ދުނިޔޭގެ އެންމެ މަޝްހޫރު އެއް މީސްމީޑިއާ މަންސަ ކަމަށްވާ ޓިކްޓޮކްގެ އިސް ވަފުދާ ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ބައްދަލުކުރައްވައިފިއެވެ.
ޓިކްޓޮކްގައި ކޮންޓެންޓް އުފައްދާ ދިވެހިންނަށް އޭގެ ޒަރީއާއިން އާމްދަނީ ހޯދިދާނެ ފުރުސަތުތައް ފަހިކުރުމާ ގުޅުންހުރި މަޝްވަރާތައް ކުރުމަށް އެ ޕްލެޓްފޯމުގެ ވެރިން ހިމެނޭ ވަފުދެއް ރާއްޖޭގައި ދަނީ ހަރަކާތްތެރިވަމުންނެވެ. އަދި މި ވަފްދު މިހާރުދަނީ ސަރުކާރުގެ ކަމާގުޅޭ އެކި ވުޒާރާތަކުގެ އިސްވެރިންނާއެކު މަޝްވަރާ ބައްދަލުވުންތައް ބާއްވަމުންނެވެ.
އެގޮތުން، އެ ވަފުދުންވަނީ އިއްޔެ އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއަށް ވަޑައިގެން ޑިޖިޓަލް ވަސީލަތްތައް ބޭނުންކޮށްގެން އާމްދަނީ ހޯދިދާނެ މަގުތައް ހުޅުވުމަށްޓަކައި ޓިކްޓޮކާ ގުޅިގެން ކުރެވިދާނެ ކަންތައްތަކާ ގުޅޭގޮތުން ޓިކްޓޮކާ މަޝްވަރާކޮށްފައެވެ.
President Dr @MMuizzu meets with TikTok’s senior delegation to discuss potential areas of collaboration. He shared his vision for digitalisation in the Maldives, while TikTok’s team highlighted how they can support that vision. Both sides expressed optimism for future… pic.twitter.com/mUuothbB5R
— The President's Office (@presidencymv) April 16, 2025
އެ ވަފުދުން ކުރަމުންދާ ޒިޔާރަތުގައި މިއަދު ވަނީ ރައީސް އާ ބައްދަލުކުރައްވާފައިވާއިރު، ރައީސް އޮފީހުގައި ކުރިއަށް ދިޔަ ބައްދަލުކުރެއްވުމުގައި އެމަނިކުފާނު ވަނީ ރާއްޖެ ޑިޖިޓަލައިޒް ކުރުމަށް ގެންގުޅުއްވާ ތަސައްވުރު ހިއްސާކުރައްވާފަ އެވެ.
އަދި ރާއްޖެ އާއި ޓިކްޓޮކް އާ ގުޅިގެން ކުރެވިދާނެ ކަންކަމާ ގުޅޭގޮތުން މަޝްވަރާކުރައްވައި ޓިކްޓޮކްގެ ވެރިން ވަނީ ރައީސްގެ ތަސައްވުރަށް އެއްބާރުލުންދޭނެ ކަމުގެ ޔަގީންކަން އަރުވާފައި ކަމަށް ރައީސް އޮފީހުން ބުންޏެވެ.
ޓިކްޓޮކަކީ ރާއްޖޭގައިވެސް ގިނަ ބަޔަކު ބޭނުންކުރަމުންދާ، އެންމެންގެ މެދުގައިވެސް ވަރަށް މަޤްބޫލް މަންސަކަށްވާއިރު، ޓިކްޓޮކްގައި އުޅޭ ބައެއް ދިވެހީންވެސް ދަނީ އެ މަންސަ މެދުވެރިކޮށް ކޮންޓެންޓް އުފައްދައި، އާމްދަނީ ހޯދަމުންނެވެ.
