ރާއްޖޭގެ އުތުރުގައި ޤާއިމްކޮށްފައިވާ 21 ފެރީ ސްޓޮޕެއް ކައުންސިލްތަކާ ހަވާލުކުރުމަށް މިއަދު ސިޓީތަކާއި އިދާރީ ދާއިރާތައް ހިންގުމާބެހޭ ވުޒާރާއާ ހަވާލުކޮށްފިއެވެ.
މިކަމާ ގުޅޭ އެއްބަސްވުމުގައި ސޮއިކުރުމުގެ ރަސްމިއްޔާތު ބޭއްވުނީ ވިލާ ކޮލެޖުގައެވެ.
އާރްޓީއެލްގެ ޒޯން 1 ގެ ދަށުން ހިމެނޭ ހއ، ހދ އަދި ށ އަތޮޅުގައި ޤާއިމްކޮށްފައިވާ ފެރީ ސްޓޮޕްތައް މި އެއްބަސްވުމުގެ ދަށުން ކައުންސިލްތަކުން ބަލަހައްޓާ ގޮތަށް ބަދަލުކުރެވޭނެއެވެ.
މި ބަދަލާ އެކު، ފެރީ ސްޓޮޕްތަކުގެ ކޮމާޝަލް އޭރިއާތަކާއި އިންވެގެންވާ ސަރަހައްދުތައް ކުއްޔަށް ދިނުމުގެ އިޚްތިޔާރު ކައުންސިލްތަކަށް ލިބިގެންދާނެއެވެ.
މި ވަގުތު ރާއްޖޭގެ 9 އަތޮޅެއްގެ 81 ރަށް، ވަނީ އާރްޓީއެލް ފެރީގެ ޚިދުމަތުން ގުޅާލެވިފައެވެ. އަދި ރ އަތޮޅާއި ބ އަތޮޅުގައި މި އަހަރުގެ ޖުލައި މަހުގެ ނިޔަލަށް ފެރީގެ ޚިދުމަތް ފެށުމަށް ވަނީ ހަމަޖެހިފައެވެ.
ފެރީ ސްޓޮޕްތައް ކައުންސިލްތަކާ ހަވާލުކުރުމަކީ ލާމަރުކަޒީ ނިޒާމު އިތުރަށް ހަރުދަނާކޮށް، ކައުންސިލްތަކަށް އާމްދަނީ ހޯދުމުގެ އިތުރު ފުރުސަތުތަކެއް ހޯދައިދިނުމަށް އެޅޭ މުހިންމު ފިޔަވަޅެއް ކަމުގައި ފާހަގަކުރެވެއެވެ.
