ހޮރްމޫޒް ކަނޑުއޮޅީގެ ސަލާމަތީ ކަންކަން ބެލެހެއްޓުމުގައި އެހީތެރިވުމަށް ނޭޓޯ އާއި އެހެނިހެން ގައުމުތަކަށް އެމެރިކާ އިން ގޮވާލި ގޮވާލުމަށް ނޭޓޯގެ ޝައުގުވެރިކަމެއް މިހާތަނަށް ލިބިފައިނުވާތީ އެމެރިކާގެ ރައީސް ޑޮނަލްޑް ޓްރަމްޕް ވަރަށް ބޮޑަށް ފާޑުކިޔައިފި އެވެ.
އިޒްރޭލާ ގުޅިގެން އީރާނާ ދެކޮޅަށް މިދިޔަ މަހު ހަނގުރާމަ ފަށާފައިވާ ޓްރަމްޕް ވިދާޅުވަނީ މިއީ މުޅި ދުނިޔޭގެ ލާބަޔާއި މަންފާއަށްޓަކައި ކުރައްވާ މަސައްކަތެއް ކަމަށްވާއިރު ނޭޓޯ އާއި މުޅި ގައުމުން ވެސް އޭނާގެ ސަރުކާރަށް އެހީވާން ޖެހޭނެ ކަމަށެވެ.
ގަލްފު ސަރަހައްދުން ތެޔޮ ބޭރުކުރުމަށް އޮތް ހުރަސްތައް ނައްތާލުމަށްޓަކައި، ކަނޑުގެ މުހިންމު ސަރަހައްދުތައް ރައްކާތެރިކުރުމުގައި އެހީތެރިވުމަށް ގައުމުތަކަށް ބާރުއަޅުއްވަމުން ގެންދަވާ ޓްރަމްޕް ވިދާޅުވީ، އެމެރިކާއިން ނޭޓޯއަށް އެހާ ބޮޑު އެހީތެރިކަމެއް ފޯރުކޮށްދެމުންދާއިރު ވެސް އެކަށީގެންވާ އެއްބާރުލުމެއް ނުލިބޭ ކަމަށެވެ. އަދި އީރާނުން ނިއުކްލިއާ ހަތިޔާރު އުފެއްދުން ހުއްޓުވުމަކީ ހުރިހާ ބައިވެރި ގައުމުތަކެއްގެ ވެސް މަސްލަހަތު ހިމެނޭ ކަމެއް ކަމަށް އޭނާ ފާހަގަކުރެއްވިއެވެ.
އެހެން ގައުމުތަކުގެ މަޝްވަރާއާ ނުލައި ޓްރަމްޕް ފެއްޓެވި މި ހަނގުރާމައަށް ތިން ހަފުތާވެ، ދުނިޔޭގެ އިގްތިސާދަށް އޭގެ ނޭދެވޭ އަސަރުތައް ކުރަމުންދާއިރު، ބައިނަލްއަގުވާމީ މުޖުތަމައުން ގަބޫލުކުރަނީ މިއީ ޓްރަމްޕް އަމިއްލަފުޅަށް ހައްލުކުރަންޖެހޭ މައްސަލައެއް ކަމަށެވެ. މިކަމާ ގުޅިގެން ޓްރަމްޕް ވަނީ ނޭޓޯގެ ގައުމުތަކާމެދު ބޮޑު ހިތްހަމަނުޖެހުމެއް ފާޅުކުރައްވާފައެވެ.
"އަހަރެމެން ހީކުރީ ކަނޑުއަޑީގެ ބޮންތައް ނައްތާލާ ދެތިން އުޅަނދު ނަމަވެސް ފޮނުވައިދޭން އެ ގައުމުތަކުން ބޭނުންވާނެ ކަމަށް. އެއީ މާ ބޮޑު ކަމެއް ނޫން، އަދި އެއީ މާ ބޮޑު ހަރަދެއް ހިނގާނެ ކަމެއްވެސް ނޫން. އެކަމަކު އެމީހުން އެކަމެއް ނުކުރި،" ޓްރަމްޕް ވިދާޅުވިއެވެ.
އެމެރިކާގެ ގާތް ބައިވެރިންގެ ފަރާތުން ފެނުނު މި އަމަލުތަކަށް ނުރުން ފާޅުކުރެއްވި ނަމަވެސް، މި ހަނގުރާމައިގެ ހުރިހާ ޒިންމާއެއް އޭނާގެ ކޮނޑުގައި އެޅުނު ކަމުގައި ވިޔަސް، މިހާރު ކަންތައްތައް ވަމުންދާ ގޮތާމެދު މައްސަލައެއް ނެތް ކަމަށް ވެސް ޓްރަމްޕް ވިދާޅުވިއެވެ.
