ރަޝިއާގެ ނިއުކްލިއާ ހަތިޔާރު އުފުލުމުގެ ގާބިލުކަން ލިބިފައިވާ ޓީޔޫ-95 މަރުކާގެ އަސްކަރީ ބޯޓެއް އާންމު ތަމްރީނު ދަތުރެއްގައި އުޅެނިކޮށް ވެއްޓި، އޭގައި ތިބި ހަ މީހުން މަރުވެއްޖެއެވެ.
ރަޝިއާގެ އިރުމަތީ އަމޫރު އޮބްލާސްޓްގެ ކްރަސްނޯޔާރޯވޯ އަވަށާ ކައިރިއަށް މި ބޯޓު ވެއްޓުނު ހާދިސާގައި ބޯޓުގައި ތިބި ހަތް ފަޅުވެރިންގެ ތެރެއިން ހަ މީހުން މަރުވި އިރު، ސަލާމަތްވި އެކަކަށް ދަނީ ސަރަހައްދީ ހޮސްޕިޓަލެއްގައި ފަރުވާދެމުންނެވެ.
ރަޝިއާގެ ދިފާއީ ވުޒާރާއިން ހާމަކުރި ގޮތުގައި، ބޯޓު ވެއްޓުމުގެ ކުރިން ޕައިލަޓުން ވަނީ އާންމުން ދިރިއުޅޭ ސަރަހައްދުތަކާ ދުރަށް ބޯޓު މިސްރާބުކޮށްފައެވެ. އަދި ދަތުރުކުރި ވަގުތު ބޯޓުގައި އެއްވެސް ބާވަތެއްގެ އުންޑައެއް ނުވަތަ ނިއުކްލިއާ ހަތިޔާރެއް ނެތް ކަމަށްވެސް އެ ވުޒާރާއިން ވަނީ ކަށަވަރުކޮށްދީފައެވެ.
ބޯޓު ވެއްޓުމާއެކު އޭގެ ތެޔޮ ގޮވައި ބޮޑު އަލިފާނުގެ ހާދިސާއެއް ހިނގާފައިވާއިރު، މި ހާދިސާ ހިނގަން މެދުވެރިވި ސަބަބު ހޯދުމަށްޓަކައި ރަޝިއާގެ އެއަރޯސްޕޭސް ފޯސަސްއިން ވަނީ ޚާއްސަ ކޮމިޝަނެއް އެކުލަވާލައި ތަހުގީގު ފަށާފައެވެ.
