ތައިލޭންޑުގެ ވެރިރަށް ބެންކޮކަށް ބޯކޮށް ވާރޭވެހި، މުޅި ސިޓީގައި ފެންބޮޑުވުމާ ގުޅިގެން ބެންކޮކްގެ އެންމެހައި 50 ޑިސްޓްރިކްޓަކީ ކާރިސާގެ ސަރަހައްދުތަކެއްގެ ގޮތުގައި އެ ގައުމުގެ ކަމާބެހޭ އިދާރާތަކުން ވަނީ ކަނޑައަޅާފައެވެ.
ބެންކޮކްގެ ގަވަރނަރު ޗާޑްޗާޓް ސިއްތިޕަންޓް ހާމަކުރެއްވި ގޮތުގައި، ބުރާސްފަތި ދުވަހުން ފެށިގެން މެދުކެނޑުމެއްނެތި ވެހެމުންދާ ބޯވާރޭގައި 300 މިލިމީޓަރާ ގާތްކުރާ މިންވަރަކަށް ވަނީ ވާރޭވެހިފައެވެ. މީގެ ސަބަބުން ސިޓީގެ މައި މަގުތަކާއި ކެނާލްތައް ފުރިގެން ބޮޑުވެ، އާންމުންގެ ގެދޮރަށާއި ވިޔަފާރިތަކަށް ވަނީ ބޮޑެތި ގެއްލުންތަކެއް ލިބިފައެވެ.
މި ކާރިސާއާ ގުޅިގެން ކުއްލި ނުރައްކަލުގެ ފިޔަވަޅުތައް އަޅަން ފަށާފައިވާއިރު، ސިޓީގެ ކައުންސިލް ސުކޫލްތައް ވަނީ ވަގުތީ ހިޔާތަކުގެ ގޮތުގައި ހުޅުވާލާފައެވެ. އަދި ފެންހިންދުމުގެ މަސައްކަތް ކެނޑިނޭޅި ކުރިއަށްދާއިރު، އެހީތެރިކަން ބޭނުންވާ ބަލިމީހުންނާއި އުމުރުން ދުވަސްވީ މީހުންނަށް އިސްކަންދީގެން އެހީތެރިކަން ފޯރުކޮށްދިނުމުގެ މަސައްކަތް ދަނީ ކުރަމުންނެވެ. ބެންކޮކްގެ ގަވަރނަރު ވަނީ، ކެނާލްތަކުގެ ކައިރީގައި ދިރިއުޅޭ ރައްޔިތުން ރައްކާތެރިކަމުގެ ފިޔަވަޅުތައް އެޅުމަށާއި، އާންމުން ގޭގައި ތިބުމަށް އިލްތިމާސް ކުރައްވާފައެވެ. މީގެ އިތުރުން ފެންބޮޑުވެފައިވާ ސަރަހައްދުތަކުން އުޅަނދުފަހަރު ސަލާމަތްކުރުމަށްޓަކައި އެމްއާރުޓީ ރޭލު ސްޓޭޝަންތަކުގެ ޕާކިން ސަރަހައްދުތައް ވަނީ އާންމުންނަށް ހިލޭ ބޭނުންކުރެވޭނެ ގޮތް ހަދައިދީފައެވެ.
ތައިލޭންޑުގެ މޫސުމާ ބެހޭ އިދާރާއިން އިންޒާރުދީފައިވާ ގޮތުގައި، ކުރިއަށް އޮތް ދުވަސްތަކުގައިވެސް އެ ގައުމުގެ އެކި ސަރަހައްދުތަކަށް ބޯކޮށް ވާރޭވެހި، ފްލޭޝް ފްލަޑް އަދި ކަންކަން ފުރިގެން ބޮޑުވުމުގެ ނުރައްކާ އެބައޮތެވެ. ބެންކޮކްގައި 2011 ވަނަ އަހަރު ހިނގި ފެންބޮޑުވުމުގެ ކާރިސާއަށްފަހު މިއީ މިފަދަ ބޮޑު ފެންބޮޑުވުމެއް ކުރިމަތިވި ފުރަތަމަ ފަހަރު ކަމަށް ބައެއް އާންމުން ދަނީ ބުނަމުންނެވެ. ކަމާބެހޭ އިދާރާތަކުން ދަނީ ހާލަތު އާންމު ހާލަތަކަށް ގެނައުމަށްޓަކައި ހުރިހާ ވަސީލަތްތަކެއް ބޭނުންކޮށްގެން މަސައްކަތް ކުރަމުންނެވެ.
