އެމެރިކާގެ އަސްކަރިއްޔާއިން އީރާނުގެ 5 ތެޔޮ ޓޭންކަރަކަށް ވަރުގަދަ ހަމަލާތަކެއް ދީ ހަލާކުކޮށްލުމާ ގުޅިގެން، އީރާނުން ބަދަލުހިފުމުގެ ގޮތުން ޖޯޑަންގައި ހުންނަ އެމެރިކާގެ އަސްކަރީ މަރުކަޒަކަށާއި ހަނގުރާމަމަތީ މަނަވަރުތަކަށް އަމާޒުކޮށް މިސައިލް ހަމަލާތަކެއް ދީފިއެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސްއިން ބުނި ގޮތުގައި ޖޯޑަންގެ އަލް އަޒްރަޤް ބޭހުގައި ހުރި އެމެރިކާގެ އަސްކަރީ މަތިންދާބޯޓުތައް ބަހައްޓާ ތަންތަނަށް މިސައިލް ހަމަލާތައް އަމާޒުކޮށް ބޮޑެތި ގެއްލުންތަކެއް ވަނީ ދީފައެވެ. ނަމަވެސް، ޖޯޑަންގެ އަސްކަރިއްޔާއިން ހާމަކުރި ގޮތުގައި އީރާނުން ފޮނުވާލި 20 ބެލިސްޓިކް މިސައިލްގެ ތެރެއިން 18 މިސައިލް ވަނީ ވައިގެ ތެރެއިން ވައްޓާލައިފައެވެ. އަދި ބާކީ 2 މިސައިލް ވެއްޓުނީ މީހުން ދިރިނޫޅޭ ސަރަޙައްދުތަކަށެވެ.
މެދުއިރުމަތީގެ ކަނޑުގެ ސަރަޙައްދުގައި ދެ ޤައުމުގެ ދެމެދުގައި ބަދަލުކުރެވެމުންދާ މި ވަރުގަދަ ހަމަލާތަކުގެ ސަބަބުން، ހޮރުމުޒް ކަނޑުއޮޅިން ދަތުރުކުރާ އުޅަނދުފަހަރަށް ނުރައްކާ ބޮޑުވެ، ބައިނަލްއަޤްވާމީ ބާޒާރުގައި ސާފުނުކުރާ ތެލުގެ އަގު ވަނީ ފީފާއަކަށް 100 ޑޮލަރާ ގާތަށް އުފުލިފައެވެ.
